Nadai agi servis feri lepas Jematan Batang Saribas enggau Krian tembu

BETONG: Perintah Sarawak keran ngemujurka pengawa ngaga jematan ba sepanjai jalai tebing sungai kelimpah nentuka nadai agi servis feri dipejalai ba menua tu dudi hari.

Kepala Menteri Datuk Patinggi Abang Johari Tun Openg madah, mayuh jematan deka digaga ngambi nyikap infrastruktur ba jalai tebing sungai.

“Diatu, kitai udah ngepunka pengawa ngaga dua jematan nyadi sebagi ari jalai tebing sungai iya nya Jematan Batang Saribas enggau Jematan Sungai Krian ti diketu ketegal Atur Tagang Pejalai (PKP) diteritka ba menua tu.

“Kelimpah Jematan Nanga Lassa ti udah digaga kitai, Jematan Kemena benung digaga, Batang Paloh, Jalai Pasi (Rajang) diatu deka digaga ti disadang tembu ba taun 2024.

“Nya kebuah, ba timpuh tiga ngagai empat taun, semua endur ba kandang tebing sungai tu deka disambung enggau jematan enggau jalai tebing sungai,” terang iya.

ARAPKA MUJUR… Abang Johari disempulang bala bukai lebuh bejadika pengawa nasih tanah Jematan Sungai Krian, ditu kemari. GAMBAR OSMAN RAZALI.

Abang Johari mansutka jaku nya ngagai pemberita pengudah ngabas taba projek ngaga Jematan Sungai Krian enggau Batang Saribas, ditu kemari.

Terang iya, penembu semua jematan nya kelimpah ari Jematan Batang lupar ti begunaka timpuh lima taunt u deka nukar servis feri.

“Kitai nadai agi ngena servis feri ari Kuching ngagai Sibu kelimpah ari feri Batang Lupar.

“Kitai nemu inisiatif perambu jalai tebing sungai tu deka nyungkak bidang ekonomi bukai kelebih agi pengawa betanam betupi sereta nambahka jalai penyambung ngagai kandang menua pesisir,” ku Abang Johari.

Taja pia ku Abang Johari, semua pejalai projek tu meseti dipejalai nitihka chara idup baru.

Nangkan nya, Penghulu Kampung Sessang Kamalludin Mohd. Ramli ngasaika penatai Abang Johari nya ngayan ketuai Gempung Parti Sarawak (GPS) keran nyendiaka perengkaguna ke manah agi ungkup rayat.

“Kami endang ngarapka Jematan Sungai Krian tu ulih digaga awakka ngemuntang pejalai ngagai mayuh kandang menua pesisir.

“Penembu Jematan Krian tu mega ulih ngelimat jam pejalai enggau penyauh endur ti deka dilawa makin semak.

“Projek tu mega deka meri pemaik ngagai peranak ngambi nyual asil betanam betupi ungkup nyungkak ekonomi,” terang iya.

Ku Ramli, pekara tu deka ngubah jalai penyambung komuniti enti dibanding 20 taun ke udah.

Pemancha Pelilih Pusa Awang Raziee Awang Mohd. Zain ngaku pengawa ngaga jematan ba sepanjai jalai tebing sungai nya endang berita manah ke lama udah dianti iya.

“Kitai bela nemu servis feri tu suah dedat tang enti bisi jematan, pejalai kitai deka lanchar laban enda ibuh nganti feri agi.

“Aku ngarapka semua jematan ti diperambu perintah kelebih agi Batang saribas enggau Sungai krian tu ulih dipejalai enggau manah.

“Aku mega deka meri besai terima kasih ngagai Abang Johari enggau Perintah GPS laban tu mih projek besai ti deka meri pemaik besai,” tandu iya.

Iya minta perintah beratka pemansang ba Pusa nyadi Pelilih Penuh ti baru beumur urung empat taun.

Projek Jematan Sungai Krian nya beungkus RM75 juta enggau diperambu tembu kena bulan March 2022 seraya Projek Jematan Batang Saribas beungkus RM375 juta.

Sama datai Menteri Muda Infrastruktur enggau Pemansang Palan Penyangkai Kapal Datuk Julaihi Narawi.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak