Peminat malin ngurangka pengilap merindang

Sylvia Banyie, 21 peranak asal Miri siku ari penanyi Iban ke majak dikelala ba dunya pemerindang kelebih lagu-lagu Iban ti mai genre dangdut kenyau ari taun 2015.

Anak lumur tiga ari empat iku diri menyadi tu diatu benung nyambung pelajar ba tikas Diploma ba Open Universiti Malaysia (OUM) Pampang Miri.

Mulaika pengingat rambau keterubah ngerikod lagu album kompilasi dandgut begulai enggau penanyi ke udah mayuh peneleba baka Ivy Ubang, Bolkiah Rewinna, Pretty Nina, Emma Anthony enggau Lucyana. Nyadi maya nya, aku enda nyadang album nya terus nerima sambut ke manah ari peminat, aku ingat nama lagu ke asil ditengkebang aku nya ‘Bujang Oh Bujang’.

Entara lagu-lagu Slyvia ke tebilang sereta ulih dipeda ba channel youtube luhproductionmusic iya nya Asal Ati Tua Gaga, Amat Keran, Ukai Nganu Nuan, Bujang Miri, Lelengau Belama, Anang Sebana, Pedis Ati enggau mayuh agi ke bukai.

Kebendar maya lepa aku sigi rindu bekaraoke kelimpah ari nyumai. Juluk ati sigi deka gagit deka meda industri muzik Iban terus mansang ke mua munyiku jaku sempama orang ke maya hari, kitai deka duduk sama baruh enggau bediri sama peninggi enggau industri muzik menyadi kitai di Indonesia.

SABAR NGANTI…Slyvia maya ngerakam video ungkup album pemadu baru ke disadang deka dipansut dalam timpuh besemak. -Gambar Facebook Slyvia Banyie David

Pengarap ba diri empu aku deka terus nyingkang sebaka pemansang enggau orang bukai ba dunya pemerindang lalu aku naka ulih beretan dalam industri tu nyentuk ke jemah ila.

Lebuh ditanya bekaul pemar tauka penanggul ditapi sekumbang nyadi penanyi iya madah, penguji ba dunya pemerindang sigi mayuh tang ketegal pengasih Tuhan ke kitai iya sigi enda nguji ngelui ari pengulih kitai. Semua penanggul ke nekul belubah-lubah teputar asal kitai puh enggau liat ati nempu iya kelimpah ari sukung sereta peransang ari diri sebilik, bala pangan sereta bakih.

“Ba sukung enggau jaku peransang ari bala peminat kebendar nya mih ke nyadi pugu pengering semangat kami merindang kelimpah jaku pejah ke positif mega nyadika malin pejalai ba dunya pemerindang. Peminat anang irau, aku seruran nerima nama aja buah runding ke manah ari bala kita.

“Kebuah pia laban ba aku penemu ari peminat chukup beguna, enti nadai sukung ari kita sapa mih kami ke merindang.

“Pia mega ari penemu bala peminat mega aku ulih ngurangka pengilap diri maya merindang,”ku iya lebuh dirandau pemberita, apin lama ke udah.

MERINDANG…Slyvia maya dikangau merindang ba sebengkah palan pemerindang di menua tu.

Kelimpah ari merindang, Slyvia mega ngemeranka pengawa dagang iya nya ngelakuka produk penganta Faith Fluer.

Ungkup pengawa pemerindang diatu kami benung kiruh ngaduka siti album baru dibaruh perabung LUH Production lalu disadang tembu dalam timpuh besemak.

Album kompilasyen dangdut enggau solo ke pemadu baru tu asil keranjai jari penengkebang lagu ke landik baka Davney David, Samuel Joe,Maxwell Franklin Saran, Bibie Sulu, Hairee Francis enggau Tony engkabi.

“Nya alai, aku ngarapka bala peminat terus besabar nganti penatai album baru aku tu ti deka dipansut enda lama agi. Nama album iya bedau ditetap agi lalu biar mih resia dulu,” ku iya.

Berebak enggau nya, Slyvia meri terima kasih ngagai semua bala peminat ke enda mudah leju nyukung sereta nerima penatai iya ba dunya pemerindang.

“Enda tinggal meri terima kasih besai ngagai dua iku ‘sifu’ aku iya nya Bolkiah Rewina enggau Davney David laban mayuh ngiring ngembing aku dalam bidang tu kenyau ari umur aku, 16 taun,” ku iya.


SYLVIA BANYIE
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak