Projek dikemendar jeman PH ditampung ke pemaik rayat

KUCHING: Menteri Kanan Infrastruktur Datuk Seri Fadillah Yusof nyamin projek ti udah dikemendar tetap dipejalai.

Ku iya, pengawa ti udah dipejalai nyengkaum utai disebut ex-Menteri Kereja Raya Baru Bian iya nya jalai alternatif entara Sabah enggau Sarawak deka ditampung ungkup pengelantang rayat.

“Lebuh aku meda baru dokumen nya, kebendar nya agih ungkup tiga jematan ke dikinsil lalu diungkup kena ngaga projek jalai penyambung nya taja ukai batang jalai diberi pemerat.

“Kitai berundingka pengelantang rayat lalu projek tu udah dikemendar ba tikas tinda. Nya alai kitai deka nampung projek tu,” ku iya lebuh dirandau pemberita ba rumah iya ditu, 12 June tu tadi.

Fadillah nyemetak madah, projek nya ditampung ukai ketegal politik tang sida berat agi ke pekara pengelantang menua, nengeri enggau rayat.

Lebuh nerang pasal projek ba Sabah enggau Sarawak baka Jalai Besai Pan Borneo ti tejanggal, iya madahka pekara nya deka dibantai udah tu ila.

“Diatu kitai benung minta timbal penemu ari semua opis menteri lalu deka dibantai ba kabinet pasal chara enggau strategi ngambika kitai ulih nampung pejalai projek nya enggau manah agi.

“Enti ulih, kitai deka ngerumban pengawa tu nentuka projek ulih tembu jampat,” terang iya.

Ba lansa sama, iya nyemetak madahka Kaban Pengatur Projek (PDP) enda ditumbuhka baru laban udah dikinsil Perintah PH lebuh megai perintah suba.

“Kitai patut bebasaka pengawa nginsil PDP laban perintah sida udah ngaga pemutus ketegal ngelimat belanja.
“Kebendar, pekara belanja ke dikelimat ukai baka disebut ex-Menteri Wang Lim Guan Eng,” tandu iya.

Nambahka nya ku Fadillah, projek perintah besai ti udah diambi enggau dipelanja Perintah Sarawak pengudah dikinsil Perintah PH suba tetap dipejalaika Perintah Sarawak.

“Taja pia, pekara deka dipejalaika aku dalam RMK12 iya nya meda projek baru ti nyadi fokus besai Sarawak ngambika menua tu diberi pengelebih ari Perintah Besai kelebih agi ngerumban pengawa nyeleti sekula repuk enggau ke bukai,”ku Fadillah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak