Tiga taun agi jalai begembar 4 tembu

KOTA SAMARAHAN: Penanggul jalai sekut ke suah ditapi peranak ba genturung Jalai Datuk Mohd Musa ditu deka teputar dalam timpuh tiga taun agi pengudah empat lorong di Jalai 8101 tembu.

Menteri Kanan Infrastruktur Datuk Seri Fadillah Yusof madahka, projek nya udah dikemendarka iya maya nyadi Menteri Kereja Raya ba baruh Perintah Barisan Nasional (BN) tang ketegal ubah Perintah Besai ngagai Pakatan Harapan (PH) enggau ubah pelasar menua pengawa nya lalu tejanggal.

“Taja pia, projek tu diteruska baru tang kereja fizikal enda ulih digaga empas ari Atur Tagang Pejalai (PKP) ketegal igi penyakit Covid-19 taja Surat Setuju Terima (SST) dikeluarka kena 17 Mac nyin kemari.

“Bisi 43 buah sekula enggau lima klinik ba pelilih tu sereta urung 70,000 iku penguna begunaka jalai tu ninting hari pengudah diseruri lalu ungkus nya manggai RM180 juta,” ku iya.

Iya bejaku munyi nya ba aum pemberita pengudah bejadika projek nyeruri jalai tu ditu, kemari.

Ku Fadillah, jalai 8101 Datuk Mohd Musa nya bisi 11.6 kilometer pemanjai ti nyadi jalai penyambung pemadu beguna entara Kota Samarahan nuju Kota Sentosa enggau Kota Padawan ke majak mansang ba sektor begaga ke rumah.

Tandu iya, jalai alun Perintah Besai nya udah dikeluarka ngagai Kontraktor Musyati Sdn. Bhd nengah tender tebuka sereta ‘piawaian’ U5 standard JKR.

“Lebuh kereja ngaga jalai nya bepun ila, dia bala penguna deka napi pemar jalai alun sekut balat agi.

“Nya alai, aku ngarapka semua penguna jalai alun nitihka atur penyaga jalai alun dikena ngurangka penyadi kes bebadi jalai alun,” ku iya.

Berebak enggau nya, ku iya, semua penanggul ti deka ditapi penguna jalai ba jalai alun nya ila enda ibuh diayanka ba sebelah media rama tang terus berandau enggau piak ti bekaul.

Iya madahka, Sarawak enda ditinggalka dalam pemansang infrstruktur ba baruh Langgur Pemansang Malaysia Lumpar Kesebelas (RMK11) lebuh nerima agih belanja RM3.6 billion.

“Agih belanja tu diguna ngaduka 21 projek nyengkaum ngaga jalai alun baru, jematan enggau jalai puntang.

“Tang, bisi projek ti dilanggur tumu enda sempat digaga semua ketegal ubah Perintah Besai ba baruh PH,” ku iya.

Taja pia, iya madahka beberapa projek ti dulu dilanggur baka ngaga Jematan Batang Lupar, Jematan Batang Igan enggau Jematan Batang Rambungan enda dikinsilka semina ditangguhka aja.

“Kelimpah ari nya, pengawa ngaga jematan di Sungai Semanju, Lemanak enggau Batang Undop deka diganti ba taun tu,” ku iya.

Sama bisi datai, Menteri Muda Infrastruktur enggau Pemansang Penyangkai Kapal Datuk Julaihi Narawi enggau Kaban Parlimen Kota Samarahan Rubiah Wang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak