Unifor netapka atur maksimum besembiang 250 iku

KUCHING: Unit Pekara Pengarap Bukai (Unifor), Opis Kepala Menteri udah ngaduka atur baru penyampau ulih begempuru sembiang iya nya ditambah maksimum 250 iku ungkup sekali besembiang.

Nitihka penerang, pemutus nya seriris enggau pekara ditetapka Komiti Penyangga Penusah Ngenyit nengeri (JPBN) Sarawak ti ngemendarka 250 iku penyereta ngulu pengawa diatur perintah enggau peribit nitihka pemesai endur pengawa nya diatur.

“Taja pia, Unifor udah netapka atur enda lebih ari 100 iku ulih ngulu pengawa besembiang.
“Pengawa tu udah dipadah di baruh Perkara 3.1 ba Atur Rumah Sembiang dibuka baru ke dulu suba,” ku iya meri penerang.

Taja pia, semua rumah sembiang ti dibuka baru kena 20 June tu dilalau semampai bejimat enggau nitihka semua Standard Atur Pengawa (SOP) ti udah ditetap.

Nitih ku penerang Unifor, pekara bekaul rumah sembiang dibuka baru nya ungkup rumah sembiang ti digazet di baruh Missionary Societies Ordinance 1937 (Sarawak Cap.106) tauka di baruh Lembaga Amanah Khairat Bukan Islam.

Pia mega, pekara tu di baruh Charitable Trust Ordinance 1994 ti berejister enggau Opis Pengerjister Gerempung Malaysia (ROS) di baruh Akta Pertubuhan 1966 (Akta 335).

“Penerang pasal muka baru rumah sembiang tu meseti digaga nengah Indu Opis Rumah Sembiang ngagai Unifor ngena Pom PP.01/2020 seraya sida ti nadai indu opis tau nganjung pom nya ngagai Unifor.

“Pom tu ulih diambi ba website Unifor di http://jkm.sarawak.gov.my enggau http://jkm/sarawak.gov.my/UNIFOR.

“Pom tu mega ulih diambu ba Indu Opis Rumah Sembiang kita sereta ba Opis Residen enggau Pelilih,” tandu iya.

Ungkup penerang silik, mensia mayuh tau telefon tauka email ngagai pemesai ba Unit Polisi enggau Kaul Mensia Mayuh Unifor: Simon Engka Crown ( simone@sarawak.gov.my / 082-550610 sambung 126/ 014-5750990) enggau Ambrose Linang Sidu (ambrosels@sarawak/gov.my /028-550610 sambung 127 / 019-8780787).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak