Pakan enda dikelaung ari pemansang

SARIKEI: Perintah Sarawak keran ngemansangka Pakan nentuka sitak nya enda dikelaung nerima arus pemansang.

Kepala Menteri Datuk Patinggi Abang Johari Tun Openg madah, inisiatif ti dipejalai nengah Langgur Pemansang Lumpar Ke-12 (RM12) nya nyengkaum pengawa nyambung Jalai Pakan Renggat Ketiga enggau ngaduka baru Pasar Pakan.

Ku Abang Johari, inisiatif nya ukai semina pulaika pemanah ngagai peranak menua tang mega ulih nyungkak pengulih Pakan nyadi pemansut asil betanam betupi.

“Seharitu (kemari) peranak Pakan udah nerima penyambung jalai alun ke manah agi pengudah Jalai Ulu Kota-Pakan (Renggat Kedua) udah tembu.

“Penembu projek jalai tu mega ngayanka perintah ukai semina bejaku ngapa.

“Nya kebuah, kami setuju nyambung jalai tu ngagai Renggat Ketiga nyambung Pakan ngagai Bukit Sadok enggau Beting,” ku iya.

Abang Johari mansutka jaku nya lebuh bejadi Jalai Pakan Ulu Kota Renggat Kedua, ditu kemari.

Terang iya, Pasar Pakan deka diaduka baru nengah RM12 kelimpah dekaka pasar Pakan nyad sebagi ari mengeri baru ba Bagi Menua Sarikei.

Ku iya, inisiatif tu mungkur pengawa nangkir pasar Pakan kelimpah nambahka rumah, kedai enggau palan rekreasyen.

“Aku udah minta Opis Tanah enggau Survey nengah Unit Pengatur iya ngaga pelin besai lalu nengah RMK12 nya, kitai deka ngemansangka pasar tu.

Projek Jalai Pakan-Ulu Kota, Pakan dibagi ngagai dua renggat. Keterubah iya ngaul pengawa ngaga jalai besai (jalai batang) sepanjai 13.3 KM standard JKR R3 beungkus RM63.7 juta.

Projek jalai nya digaga pengelama 29 bulan berengkah ari 8 Januari 2009 enggau tembu kena 15 June 2011 laban diperati baru timpuh projek nya (ke bendar iya tembu kena 7 Januari 2011, digaga ba timpuh 24 bulan).

Pengudah ngaga jalai batang, projek nya mungkur 0.37 KM jalai mit, 38 RC entali ai, Jematan RC meraka Sungai Ulu Julau terus nuju Pakan Wuak.

Bagi Projek Jalai Pakan / Ulu Kota, Pakan (Fasa II) ngaul jalai batang pemanjai 15.4 KM JKR R3 REAM Standard beungkus RM122.5 juta.

Berebak enggau nya, Abang Johari madahka jalai nya deka nambahka pengulih Pakan nyadi pemansut asil betanam betupi enggau dagang temuai.

“Perintah keran bejalaika pemansang dikena ngubah nasip peranak menua ulu enggau menua pesisir nyengkaum ba Pakan.

“Inisiatif begulai tu nentuka sektor bekaul mega ulih dikerembai kelimpah nyendiaka peluang ekonomi baru ngagai peranak ditu.

“Nya kebuah, semua piak mesti nyukung enggau meri kerejasama ngambika perambu kitai ulih dipejalai,” ku iya nangkan.

Ngelansa pasal arus penyambung ti enda deras ba Pakan, Abang Johari madahka perintah seruran bejalaika chara mutarka penanggul tu nentuka rayat Sarawak enda tinggal ba arus pemansang digital.

“Naka diatu, kami udah nirika 170 tiang pemanchar ba selampur menua nengah Kaunsil Multimedia Sarawak (SMA).

“SMA disadang deka nyendiaka servis arus penyambung ba menua pesisir pengudah bulih lisin nyendia servis internet (ISP),” ku iya ngelansa pasal arus penyambung di menua tu.

Beduduk ari nya, iya mega madahka diri udah betemu enggau Menteri Komunikasyen enggau Multimdia Malaysia enggau minta ngulihka lisin ISP ungkup SMA sama baka lisin nyendia arus penyambung bukai.

“Bayar internet nengah SMA jauh murah laban perintah meri subsidi kelimpah ulih beoperasyen ba sitak menua pesisir,” tandu iya.

Sama datai Menteri Muda Infrastruktur enggau Pemansang Palan Penyangkai Kapal Datuk Julaihi Narawi, Adun N.47 Pakan, Tan Sri William Mawan, Adun N45 Repok Dato’ Sri Huang Tiong Sii enggau Residen Sarikei, Felicia Tan Ya Hua.

BEJADI PROJEK… Abang Johari disempulang Mawan lebuh bejadika Projek Jalai Pakan Ulu Kota Renggat Kedua, ditu kemari.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak