TUNTUNG lemambang dikena nanya ensumbar semampai dianti mensia mayuh nyerumba malam Gawai Antu.

Ba bansa kitai Iban pengerami Gawai Antu nya atur pemadu besai lalu dikena merantu orang ke udah parai ninggalka dunya injau kitai tu.

Taja pia, ukai semua menua ngena jalai ti sama nirika gawai tu.

Kebuah pia laban mayuh menua semina niri gawai nya sepintu bilik aja.

Tang, ba menua Batang Krian enggau Saribas Gawai Antu tu diintu orang serumah nya.

TIMANG JALUNG… Lemambang ti bisi tiga ngagai lima gerup deka mengap ba sepanjai rumah panjai nya. GAMBAR FACEBOOK BUJANG DARA DARAH IBAN.

Pia mega, bisi sebuah rumah panjai nya ngintu gawai nya bisi takah ngagai 30 taun baru ngintu sekali lalu utai ke balat ngerinduka ati ba siti-siti Gawai Antu nadai lebih ari ngulu tauka semina meda orang ke Ngalu Petara.

Tu mih maya bala indu dara pansut ngena ngepan asal kitai Iban, lebuh sida ke bejalai niti ruai sama enggau bala bukai sereta bala raban lemambang ke nimang jalung.

Nyau richah munyi dauh burung pilin munyi duit tating kain sida bepangka.

Lalu udah tembu Ngalu Petara, lemambang lalu belabuh nimang baru nyentuk sida nembuka timang enggau tuntung jalung.

Sida ti nuntungka jalung nya belabuh urung pukul 3 dini hari.

NGIRUP AI JALUNG… Bala lemambang deka ngirup ai jalung nya ba Pengerami Gawai Antu. -GAMBAR FACEBOOK BUJANG DARA DARAH IBAN.

Nyadi tu utai siti ke ngerindu bendar ati, laban nya maya orang nuntung bujang berani.

Kebuah pia, semina orang ke udah bedengah enggau orang ke aris aja tau ngirup jalung.

Tu mih maya lemambang lalu nanya ensumbar bala sida ke makai jalung nya.

Ensumbar tauka gela tu mai mayuh reti ke belalai tauka cherita lalai.

Aku kala berandau enggau siku orang ti suah dikangau ngirup jalung ari Kedap, Saratok.

“Tebal agi, sida ke bisi ensumbar nya endang orang ke udah bulih dengah munuh munsuh, taja pan bisi sekeda nya bulih dengah ba kaki tangga.

“Reti tu, sida ukai bedengahka munsuh tang udah ampit basah jari.

“Bisi nya udah munuh orang lebuh ke belaya, bisi mega nya udah munuh orang ari kebuah bukai,” ku Lagat @ Anyau, orang ti suah dikangau ngirup jalung ari Kedap, Saratok lebuh berandau enggau aku.

Lagat ngirup jalung ngena gela Baya Mangah Teluk Lubuk, Rara Rangka Manggum Buok.

Amat mih Gawai Antu tu jarang agi didiri diatu, tang agi bisi Gawai nya didiri lalu orang ke ngirup jalung nya sigi agi beguna.

Nya kebuah, ba menua batang Krian enggau Saribas sigi agi tubah orang ke ulih ngirup jalung enggau buluh kena nembuka Gawai Antu.

Nyadi lebuh Gawai Antu ba rumah panjai Sungai Klampai, di Saratok urung taun 1970 suba, endang agi mayuh sida ke diambi ngirup jalung nya orang ke udah bedengah.

Lebuh nya, seraban orang ti nimang jalung nya bala sida aya aku, Dundang anak Enchana.
Iya matak jalai nyadi ketuai bala lemambang ari Malupa.

Rindu amat ninga sida ke nimang, kelebih agi lebuh sida ke nuntung jalung ngagai bala pungka lelaki ke ngirup jalung.

Orang keterubah ngirup jalung kena tuntung lemambang Dundang iya nya niang Tindin tauka Apai Gawing, sida ari Mendas.

Tuntung nya munyi tu:

“Lama kitai ke besaruk duduk bebanding. Ku lama udah ninga gela nuan unggal dedarah sawa indu tedung, ba arung jalai pemuntang.

“Oh sapa perinyai ambai sulu sangkung lebuh jawang agi gegayang gamal gegandung, alai tangan tunjuk ujung nuan tau dinjau orang nyuluk ka upung nyiur nyintung tak lepung-lepung mesai tempulung lang tansang, oh ku aku tansang lang.”

Udah nya tadi Tindin lalu nempap tikai madahka ensumbar diri ‘Pipit Manchal Menua Ili, Gelumbang Mechah Hari Jai.

Niang Tindin suba siku orang ke bagak sereta jegak lalu suah udah diambi ngirup jalung ba Batang Krian enggau Saribas.

Udah nya, lemambang Dundang lalu nuntung ka jalung ngagai siku agi pungka lelaki ke ngirup jalung ba ruai orang nya, iya nya Taboh anak Tilang sida ari Batu 4 Jalai Lama Roban/Saratok enda jauh ari rumah orang ke begawai nya.

Nyadi tuntung Dundang tauka dikumbai Apai Aling munyi tu:

“Oh…lama lemai kitai ke besaruk duduk berintai, lama udah aku ninga gela nuan ke bedarah sama tedung tendai, entang ke tu lebuh kitai kebejaku kelulu nyampau dirintai, kali jenti nuan udah bebini, tang lebihka gayang gamal lelempai, sapa ambai tulang peransang…iya ku aku peransang tulang..oooh”

Dia Taboh pan lalu madahka ensumbar diri ‘Pemalu Batang Buan, Pengirit Menua Batu Enam’.

Udah tuntung ngagai Taboh dia Dundang pan lalu nuntung unggal Anthony Lawai, ke lebuh nya agi mengkang nyadi pengajar ba sekula primari.

Pengajar Lawai tu orang ke jegak sereta pemanas tang siru sereta nadai mentas begulai enggau orang.

Nyadi lebuh ke dituntung ulih lemambang Dundang ba Gawai nya, tuntung nya munyi tu:

“Jadi aku deka nanyaka ensumbar sida bujang mereti aya Tedi ke berani ati tunggang changka. Tadi aku nanya ka ensumbar sida unggal ke digelar dua dama.

“Nya alai tu laban pengawa ke bakarera mayuh dikereja, ditangkap rikot opis radio.

“Nya alai tu aku meda unggal aku Lawai jadi master, bisi ditu begulu duduk besemuka.

“Aku nanya ensumbar iya, kebuah randa tau nembuka pengawa ngadu kereja, nanya ka gelar ensumbar nama dedinga raja ti sabara orang ngeluie…iya, oooh ngeluie orang.”

Saut Anthony Lawai madahka iya bisi dua iti ensumbar.

Reti nya iya udah bulih dua dengah.

Ensumbar iya keterubah iya nya ‘Unsut Insai Baruh Batu’ lalu iya ti kedua nya ‘Lalang Layu Ulu Sarikei’.

Diatu Anthony Lawai udah pinchin nyadi pengajar lalu agi regas bendar enggau orang kulu-kili.

Udah iya nuntung Lawai, dia Apai Aling lalu nuntung niang Nyawin anak Merdan tauka Apai Enduh bala kami ari Kedap dalam Malupa.

Nyawin tu kala ampit enggau orang nyadi polis ba Pasar Bau enggau siku orang ti landik ngajat, kering sereta nelap.
Nyadi tuntung Apai Aling ngagai iya lebuh Gawai nya munyi tu:

“Lama ga udah betunga duduk betiban, selemai ke rangkai jauh malam. Nya alai nuan ke dipeda aku tak beria-ria di puncha panau lengan, tak mua tampak baka senayak pajar bulan.

“Nuan endang dipaduka sida ditu Batang Sebetan nembu pengawa sida ke udah lela matai danjan.

“Nya alai nuan digela aku sama, digela aka melimban. Nya alai sapa dama ambai nuan bujang besai ke lelempai tubuh memelan.

“Aku meda jari kiba nuan endang bisi becherengga pansa darah Iban.

“Nya alai aku tu endang nemu nuan amat berani ati tunggang tajam, tang aku enda nemu gela ensumbar nuan.

“Tang enti enda berani ati tunggang tajam, bula orang ke madah nuan nyuluk tandan nyiur bulan, tak melan-melan sadau, gagang deh labuh iya…oooh, ku aku labuh gagang…oooh.”

Ninga munyi nya, nyau meletup tempap tikai niang Nyawin kelia.

Udah nya iya lalu madahka ensumbar diri ‘Lambur Mandang Punggang Menua, Api Nyadi Pasar Buso’.

Pengudah iya nuntung ka jalung ngagai Nyawin, lemambang lalu nuntung ngagai siku agi bujang berani iya nya niang aki kami Jerampang anak Saat ari Assam, Malupa.

Nyadi timang tuntung Apai Aling munyi tu:

“Lama kitai ke bepangkang bedenjang duduk bebandung, nya alai aku meda tak tinggi di suli imbai serangkung dipeda aku baka chemaru jelu remaung, landik negung sengkelung batu besundang.

“Tang ke tu, aku nemu nuan tau makai ai ginjai sida ke parai sulai pumpung, aku ninga nuan tau ngirup rakup buluh betung, nya endang bagi sida ke bebadi sulai lindung.

“Nya alai ti udah munyi tu nama gela alai nuan tau kereja nya, kedua agi ngirup ai garung, siti ke beranggung tunjang mayuh iya..oooh mayuh betunjang… ooohh.”

Niang Jerampang lalu tekala nya nyaut madah ka ensumbar diri ‘Pintu Batu Nanga Igan, Indu Balu Ditemu Jauh Malam’.

Jerampang tauka Apai Naya kelia endang orang ke chukup penegap, tinggi, bagak sereta mega regas.
Iya ukai semina ngirup jalung tang mega udah suah enggau orang ngirup buluh, iya nya segigi tinggi ari sida ke ngirup jalung.

Kepenudi iya Dundang lalu nuntung ka jalung ngagai Bandang anak Kasa, sida ari Kelua ba Batang Krian.
Nyadi timang iya ngagai niang Bandang munyi tu:

“Lama aku udah tetampai ke apai nuan jejanguk duduk di ruai, ke lasah anchau tikai, nya alai nuan udah ke injau sida rantau Sungai Kelampai, ke nembu ka pengawa sida ke udah lela matai nadai, ngirup buluh simbang landai, nya alai nuan tu digela aku tuai tau nembu ka gawai, sapa jenti bini agi lelanji tubuh lelempai agi ba tembai aku nanya ka ambai tulang diransang iya..ooooh .. peransang tulang..oooh.”

Nya ku munyi timang tuntung Apai Aling ngagai niang Bandang kelia lebuh Gawai Antu ba Sungai Kelampai.

Nyadi Bandang madahka gela diri ‘Labu Rendam Puak Kerapa’.

Munyi ku jalai tuntung timang lemambang nya tadi, orang ke udah bedengah nya enda chechamang madahka ensumbar diri.

Sida ti madahka diri ngirup jalung nya ukai ketegal bisi dengah, tuntung timang lemambang bisi lain mimit.

Nyadi enti orang ke ngirup jalung nya bebula madah diri udah bedengah, lemambang ke changka baka niang apai aku Salok Jembu tau ngena ‘tuntung sumpah’ ke tau ngujungka pemati iya ketegal iya udah bula.

Nyadi sepengelama niang apai enggau orang nimang jalung, iya udah ngena tuntung sumpah dua kali.

Seduai nya sama nyau mati, dua ngagai tiga bulan udah bekau ke ngirup jalung ba gawai nya.

Nyadi, mayuh mega orang ke ngirup jalung enggau ngirup buluh, pia mega sida udah beensumbar ke udah mati enggau ke agi idup ke dikelala tauka ditemu aku.

Ba bilik kami, niang apai tuai aku Ngauh anak Narang (keliadi tuai indai aku) mega enggau orang ngirup jalung.
Iya bulih dua iku dengah lebuh bejalai ngagai menua orang kelia.

Apai tuai Ngauh ke mati dalam taun 1973 kelia beensumbar ‘Layang Mandi Pukul Lapan’.

Nyadi aya aku niang Ujih anak Untan kelia bisi bedengah mudah lalu udah suah makai jalung.

Ensumbar iya ‘Anak Kumang Mati Lus’.

Orang ke diangkatka aku, Tawi Bungin bensumbar ‘Lanang Kasih Sayang Bedindang Madang Rutan, Tawi Berani Ati Pemudi Kayan.

Petunggal iya Naing @ Aki Kawit bensumbar ‘Berinau Panggau Dara, Naing Pengerambing Kaki Kuta’.

Siku agi petunggal seduai Subong Bran @ Aki Musa beensumbar ‘Kala Nyepit Naka Pemisa-misa, Bunga Parapenit ka Dujung Indu Dara.

Nya alai, bala nembiak rebak baru anang enggai ngenyemak diri ari tugung lemambang ke nuntung jalung lalu mendingka sida nanya gela sida aya ke udah buya datai jari, bala sida bujang ngerigang changka berani.

Bala sida ke mang ari kepayang rendam sepagi, juring ari puting peraja besi, tajam ari tandan mata geraji.

TAWI COLUMN