PUSA: Parti Bersatu enggau Pas ti madahka diri enda betanding maya Pengawa Bepilih Nengeri Ke-12 (PRN12) nya siti berita ke manah, pia ku Kaban Kunsil Nengeri (Adun) Beting Maro Razaili Gapor.

Kelimpah, berita tu meri peluang ngagai Gempung Parti Sarawak (GPS) bediri nyatup chalun baru di Beting Maro.

“Tu peluang besai ngagai GPS (PBB) ngetanka penuduk ba sitak nya.

“Kebuah pia laban kitai bela nemu, Pas endang udah lama nagit Beting Maro enggau sida mega bisi penyukung.

“Lebuh enda betanding, engka raban sida ulih enggau GPS,” ku iya.

“Tu mih pengelebih dikembuan kitai nentuka penuduk Beting Maro mengkang diempu GPS,” ku iya nyemetak madah.

Razaili ti mega Supreme Kaunsil PBB mansutka jaku nya lebuh dipinta ngelansa pasal sukung Bersatu enggau Pas ngagai GPS maya PRN12, ditu kemari.

Nitihka penerang, iya madahka parti ti deka bediri ngelaban sida sekalika parti PSB enggau Sedar diatu napi pemar meri servis laban sida apin bisi pampang ba renggat baruh.

“Nangkan nya, Amanah enggau parti PH ke bukai nadai disukung beduduk ari rikod sida majak labuh kelebih agi sekumbang nyadi Perintah Besai pengelama 22 bulan tu tadi.

“Nya alai, GPS ti diarika PBB ba sitak tu seruran gawaka rayat.

“Berebak enggau nya, maya PRN12, aku deka ngemeratka peminta rayat enggau isu pemansang.

“Enggau tuju nya, Beting Maro deka mansang nitihka chuan pemansang Sarawak manggai taun 2030,” ku iya nyemetak madah.

Nambahka nya, Razaili beratika pengawa Presiden Bersatu Tan Sri Muhyiddin Yassin enggau Presiden Pas Datuk Seri Hadi Awang nya bebasaka kaul enggau GPS ti nyukung penumbuh Perintah Besai diatu.

Terang iya, pekara tu mega ngayanka sida enggai segulai enggau DAP.

Ungkup rikod ba PRN11 ke udah Razaili menang besatup enggau chalun Pas iya nya Abang Ahmad Kerdee bin Abang Masagus enggau penyampau menang 3069 undi sereta majoriti 391 lalu Pas semina bulih 2679 undi. Sebedau nya Dun Beting Maro dipegai Datuk Hj Bolhassan bin Haji Di (BN-PBB)