KUCHING: Sitak Ai Angat ba Kampung Annah Rais di Puncak Borneo patut dipansik silik agi ba sukut pejalai ai angat tu dalam tanah enggau pendiau hidrogeokimia.

Sapit Menteri Pemansang Pengawa Bekebun enggau Komoditi Willie Mongin madah pekara nya endang patut diperati piak bekaul ngambika ulih ngemanah agi palan nya nyadi produk dagang temuai di sitak Parlimen Puncak Borneo.

“Kitai bisi minta penemu enggau servis geologi ari Opis Mineral enggau Geosains (JMG) Malaysia, Sarawak awakka beratika Palan Ai Angat Kampung Annah Rais.

“Tuju tu dikena mantu ngangat manah agi produk dagang temuai di sitak Puncak Borneo,” ku iya dalam sebengkah penerang ke dibantai dalam akaun media rama iya empu, kemari.

Dulu ari nya, Willie nerima penemuai basa ari Sapit Menteri Kuasa enggau Pengeraja Asal Ali Biju sereta bala ari Opis Menteri Pemansang Pengawa Bekebun enggau Komoditi, Putrajaya.

Nangkan nya, ku Willie iya bisi minta pansik pasal pengetan enggau peresa tanah ba sepanjai Jalai Puncak Borneo, Jalai Padawan, Jalai Link Padawan enggau Jalai Semedang – Dahan Estet laban ba kandang endur tu suah nyadi penusah tanah tusur.

Kenu ku iya, enti bisi pansik baka tu nyadi pangka penanggul tanah tusur ulih disadang lalu kitai mega ulih bejalaika atur ke patut nyeliah diri ari kena tuntung penusah tu.

“Tu beguna amat ungkup pengelikun penguna jalai alun ke suah nengah jalai ba sitak Parlimen Puncak Borneo,” ku iya.

Ungkup penemu Palan Ai Angat Annah Rais Bepalan semak rumah panjai komuniti Bidayuh lalu ngembuan pengangat ai urung 40 darjah.

Pejalai ngelawa palan tu ari Kuching urung sejam pejalai enti ngena entukar lalu chukup manah endur ngelantang ai mai diri sebilik enggau bala bakih.