MIRI: Inisiatif tambah ti dipejalai Perintah Sarawak mungkur semua serap umur, bepun ari renggat anak mit baru ada nyentuk orang tuai, pia ku Menteri Pengintu Pengelantang Komuniti, Orang Indu enggau Pemansang Anak Mit Datuk Seri Fatimah Abdullah.

Fatimah mansutka jaku nya ba aum pemberita pengudah bejadika Pengawa Nyuaka Wang Turu Pemeri Sarawak (EFS), Bantu Indai Baru Beranak (BIB), Geran Khas Ninting Taun (GTK) Pelajar Tumu Anak Mit, Kenyalang Gold Card (KGC), Bantu Pemati (BIK), Bantu Khas Pesakit Tungkul Sengayuh (BKPBP) enggau Geran NGO Bagi Menua Miri ba Dewan Tusan, Kompleks Islam Sarawak, ditu ensanus.

Ku iya, Sarawak nya entara nengeri ti mayuh nerima insiatif tambah kelebih agi bekaul pengelantang rayat enti dibanding nengeri bukai.

“Baka ti dipadah aku, kitai ke bendar udah lama bejalaika pekara tu lebuh kita ulih meda enti bisi nengeri bukai ba Malaysia ti nyendiaka bantu baka nya ungkup pengelantang rayat.

“Sarawak engka ngembuan peranak ti mimit tang kitai keran nangkup peminta rayat enggau meri bantu ungkup pengelantang semua,” terang Fatimah.

Nangkan nya, Nur Syuria Muhamad Amin, 40 taun, anak siku penerima bantu meri besai terima kasih lebuh indai iya siku ari penerima bantu nya.

Lebuh dirandau pemberita Suara Sarawak, iya beterima kasih ngagai perintah laban bantu ti diterima tu ulih ngurangka penanggul belanja mayar belanja perubat indai iya.

“Aku berasai gaga amat laban aku kala minta bantu sebedau tu lalu baru diatu mujur pengudah inisiatif tu dipejalaika perintah.

“Bantu tu ulih dikena mayar belanja berubat baka betuchi, ngintu pengelantang, perengka pengangkut enggau ke bukai,” ku anak ngagai siku penerima bantu, Lara Wahab ti beumur 64 taun nya.

Sebedau tu ku iya, semua belanja bepun ari berubat nyentuk perengka pengangkut begunaka belanja lebih ari RM3,000 ninting bulan.

Pengudah nerima bantu RM2,600 sebulan tu, Nur Syuria madahka sida sebilik berasai lantang enggau lempung agi.