LOMBOK BARAT: Tau dikumbai betuah, nasip siku lelaki mujur bebini dua semina ngena belanja mas tikah 4 juta rupiah (urung RM1,208).

Berita siku lelaki tu mujur nikah enggau dua iku indu ba hari ke sama lalu cherita tu mayuh ayan sebelah media rama.

Lombok Post nerangka pengerami nikah Saepul Bahri, 28 taun enggau dua iku bini iya, Musitiawati, 23 taun enggau Hairani, 23 taun nya mujur diatur ba Kampung Bakong, Dasan, Desa Lembar Kecamatan Lembar.

Saepul ngaga pemutus nikah enggau Musitiawati sereta Hairani pengudah tiga bulan bepangan.

Utai ke balat ngasuh alit ati diatu, Saepul enda kala betemu enggau seduai tang semina berandau ngena telefon binching aja.

“Aku enda kala betemu enggau seduai laban aku berandau ngena telefon binching aja,” ku Saepul.

“Pia mega, aku enda kala merambu deka jadi enggau dua iku indu tang ketegal balat keran, aku mutus ati ngambi seduai iya nyadi bini aku,” terang iya ti labuh pengerindu ngagai dua iku indu.

“Pengudah tiga bulan aku bepangan enggau seduai, aku lalu jadi ke seduai nya,” ku iya ti udah mulaika diri ke menua enam bulan ke udah pengudah semilan taun ngiga jereki ba Malaysia.

Terang iya, suba iya bepangan enggau Musitiawati lalu nyau ke lama iya madahka diri bisi ati ke petunggal pangan iya tadi iya nya Hairani.

“Seduai tu bela imun lalu pemajik seduai tu ngasuh aku tekait ati nya mih ngujungka aku ngambi seduai nyadika bini.

“Aku enda ngira sekalika seduai tu bisi kaul enggau pangan diri laban aku endang keran ke seduai iya.

“Tang enda nyangka rumah seduai tu berimbai aja kelimpah seduai endang bebakih.

“Kita tau nanya ngagai seduai, kebuah sanggup jadi enggau aku,” tandu Saepul.

Apai indai Saepul mega besetuju iya nikah enggau dua iku indu nya.

Saepul mega madahka dua iku bini iya nya diau serumah laban iya semina bisi siti rumah aja.