Tusun 1…

IYA meh nyau lepa pengawa udah tembu ngetau sida Apai Sali menyanak pan nyau nadai pengawa di kerja agi ba umai betaun baka orang bukai.

Besari sari tudah Apai Sali tu duduk dunga dunga begaga ke sarung duku. Nyua sepengelama ke baka nya, nyau bisi tiga iti ga sarung duku nya udah tembu digaga iya.

Nyadi pagi hari siti iya lalu madah ngagai bini iya Enchelegit Tisi Langit, Enchelegi Tisi Hari iya nya Indai Sali.

“Akai rai Indai Duat, lama bendar ga aku tu udah enda nemuai ngagai akan aku Apai Seumang Umang udah kami duai ke bai iya besilih rumah hari nya.”

“Ba nuan ka amat besulu enggau Apai Seumang Umang, enda nemu jera kediri empu.

“Setiap kali seduai besulu nuan enda tau enda bulih penusah,” ku saut Indai Sali.

“Eh! Ukai nya lama aku nemuai ngagai iya deh. Aku enggai meh kedua kali dikeduan iya baka nya belama.

“Aku empu ke tambab mudah ka dikemeli ke iya” pia ku saut Apai Sali.

Nama agi deh lalu jengkau iya duku iya ke dikait ke ba tandok rusa lalu ditangkin ke ba punggung.

Lalu japai iya sumpit lalu san iya laban ke ka nemuai ngagai akan iya Apai Seumang Umang.

Nadai beleman Apai Sali tu nurun laban enda ngasi ke jaku rara bini iya Enchelegit.

Bejalai iya kenu ku ensera ninting serarai umai sida lalu rembus ba sungai ba ulu lebak.

Sambil ke bejalai nya Apai Sali endang tak kadah kadah gining gining malik ngagai puchuk kayu ngicha kediri bisi meda kenaya burong tauka jelu laban ke lama nadai kala begiga ke lauk.

Nyau kelama iya ke bejalai, bukit di turun bukit di tiki, bejalai meruan niti menasan jalai jani dia dinga iya nyau rami munyi kukuk manuk Apai Seumang Umang ba rumah ke udah di pesilih ke seduai iya tahun nyin suba.

Lalu bejalai keno ku iya begadai gadai niti jalai pendai sida Apai Seumang Umang laban nemu diri sigi udah datai.

Datai meh iya ba kaki tangga sida Apai Seumang Umang lalu nyapa nanya ke penyadi rumah Apai Seumang Umang nya alai iya nemuai.

“Oh Akan! Nyadi rumah nuan sehari tu alai aku nemuai,” pia ku Apai Sali ngangau ari tanah.

Udah nya lalu pedea Apai Sali pansut deh anak dara Apai Seumang Umang ngelalu ke iya.

“Lalu meh Aya, nadai rumah kami sehari tu bangat bisi penti bisi pemali di tiki. Lalu meh,” pia ku anak Apai Seumang Umang.

Apai Sali pan lalu niki ke rumah. Iya pan lalu nudok kediri ba tikai ke udah di anchau ke anak Apai Seumang Umang.

Anak dara Apai Seumang Umang lalu mupok ke dapur ga nampung pengawa iya ke bebela ka lauk.

Kelama ke duduk nadai orang nunga nyau enda berasai Apai Sali nanya anak dara Apai Seumang Umang meda Apai Seumang Umang tak nadai ayan.

“Oh Umang ! Dini penunga apai enggau indai nuan deh tak nadai ayan betunga enggau aku ditu,” pia ku Apai Sali.

“Amat ga Aya, enda ingat madah ngagai nuan aku tadi. Nyau ka datai seduai iya tu pelaba ke aku.

“Laban tumu pagi tadi seduai iya nurun ngabas ginti ke di tan ke ba tisi kaki umai kami,” pia saut anak Apai Seumang Umang.

“Agi lama alai seduai tu pulai, enti enda pia mulai kediri dulu ga aku. Ila nemuai baru. Lelenggau bendar ke Akan aku nya,” pia ku Apai Sali.

“Duduk dulu meh Aya. Tu aku nyau udah mela lauk lalu nyangkung nuan merarau lagi.

“Nadai patut seduai tu tak bengat lama deh ti semina tak naka ngabas ginti,” pia ku anak Apai Seumang Umang nan ke tudah Apai Sali enggai ke lalu enda betemu enggau apai iya.

Nama agi deh lalu ngali kediri tudah Apai Sali ba tikai idas ke dianchau anak Apai Seumang Umang.

Sambil ke gali nyau nyau betampung batang ga daun ruku daun biru nya di insap iya.

Nyau baka asap orang ke nepok landak ba lubang pa pemalat kesoh asap insap Apai Sali.

Nyau enda berasai tudah Apai Sali lalu meliar ai mata meda pemanah rumah iya nya tak percuma di silih iya enggau Apai Seumang Umang laban ngingat ke pengelantang sida menyanak sekumbang ti diau ba utai ke ngemanah nya menya.

Nyau meh penumbas iya Apai Sali ke nganti Apai Seumang Umang, dinga iya tak baka lukau orang berandau ngadap ke tunga pala tangga.

Lalu beguai iya ensugau ngesai kediri ari ti gali nya laban ka nyengok ari lubang penyenguk ka meda sapa orang ke bemunyi nya tadi.

Nama agi deh pengaga ati Apai Sali meda Apai Seumang Umang seduai bini iya nyau betangkan tangkan baru datai ba pala tangga ka niki.

Peda iya Apai Seumang Umang tak naka iya pengaga megai burong tiong ba jari iya nyau baka anak mit.

Apai Sali pan lalu ngangau ari lubang penyenguk nya.

“Apo Akan! Kumbai aku enda datai seduai Indai Seumang Umang tadi.

“Udah ka mulai kediri aku tadi tang agi di tan ke Umang laban ti ngumbai seduai nyau ka pulai ngabas ginti ba tisi umai,” pia ku Apai Sali.

“Eh duduk dulu meh Akan! Lama bendar nuan udah enda nemuai ngagai kami menyanak.

“Aku tu ka limpang nyimpan burung tiong tu ba kurungan baruh rumah tu dulu,” pia ku Apai Seumang Umang nyaut iya.

Udah meh Apai Seumang Umang tembu nyimpan burong tiong nya iya lalu niki ke rumah dudok nunga Apai Sali.

Seduai iya endang baka selama tau bendar besulu enggau pangan diri lalu mayuh macham cherita ti ka dikenang enggau pangan laban ke lama udah enda betemu.

Nyau kepuas seduai iya ke berandau nya sekali dinga Apai Sali tak bejaku orang ari baruh rumah tak nyau ngeragak nya nadai orang nimbal.

Agi naka sekali orang nya bejaku enda Apai Sali ibuh, lalu perening iya ga gamal mua tudah Apai Seumang Umang ke berandau nunga iya.

Peda iya tudah Apai Seumang Umang tak nadai apa nama, tak majak kediri berandau baka ke nadai ninga utai.

Betampung… >>https://suarasarawak.my/2020/07/05/apai-sali-nginti-burung-tiong/

JOHN ADAM GILBERT ANYAI