Tusun 2…

NYAU ke leju ninga utai nyelai munyi nya dia Apai Sali lalu nanya Apai Seumang Umang.

“Akan bisi nuan ninga orang bejaku kediri nadai orang nimbal tak nyau bekelukau ba baruh rumah nuan tu.

“Ukai antu sebayan nya kini ?” pia ku Apai Sali.

“Iya ke nyau radak radak bejaku sebarang utai rara sekumbang tua ke berandau nya tadi ku nuan Akan,” pia ku saut Apai Seumang Umang.

“Au ah! Di anti niki nadai ga niki. Nanya ke penyadi rumah nuan tu nadai ga di dinga nyapa.

“Tak geli ati aku ninga orang nya Akan,” pia ku Apai Sali ga agi irau ati.

“Eh nya meh burung tiong ke di bai kami duai Indai Seumang Umang pulai ngabas ginti tadi.

“Baru ulih kami duai laban ke semampai ninga iya bemunyi ba tisi umai sekumbang kami ti ngetau tu tadi,” pia ku Apai Seumang Umang.

“Apo amat bidik nuan Akan!

“Nurun nginti tau tak pulai bulih burung tiong ukai mai ikan.” pia ku Apai Sali majak irau ati ninga Apai Seumang Umang ke nurun nginti tau tak bulih burung.

Ti tak sengapa burung enda ga iboh nya burung tiong ke udah nemu bejaku munyi kitai mensia.

“Nadai aku bula ke nuan Akan. Endang amat ulih kami duai nginti burung tiong nya tadi.

“Ginti kami duai ba lubang pun kayu ba tisi umai kami nya,” pia ku Apai Seumang Umang ngemendar ke cherita diri.

“Bah nama utai ke umpan di kena nuan nginti alai tau tak ulih nuan burung tiong nya deh?” pia ku Apai Sali laban iya tak rindu ati ninga burung tiong nya nemu bendar bejaku munyi kitai mensia.

“Nadai nya utai bukai deh Akan!
“Bai ke nuan penganan jala, telu manuk mansau, asi pulut lulun enggau penganan iri ka umpan, ka iya ulih deh, baka enggi aku tadi,” pia ku Apai Seumang Umang.

Ninga munyi nya lalu naka iya pengaga ati Apai Sali laban ngarap kediri tau bulih nginti burung tiong.

Seduai iya Apai Seumang Umang pan lalu besemaia laban hari siti Apai Seumang Umang madah kediri ka nunjuk ke Apai Sali madah ke dini bagi lubang pun kayu ke agi bisi alai burung tiong nya besarang.

Udah meh tembu merarau tengah hari nya dia Apai Sali lalu madah kediri ka pulai.

Iya lalu berat rat bendar enggai ke Apai Seumang Umang bula enda nurun pagila ngulu ke iya nginti burung tiong munyi ke tusoi Apai Seumang Umang ngagai iya.

Datai Apai Sali ba langkau iya empu dia iya lalu ngasuh bini iya Enchelegit ngaga penganan jala enggau penganan iri.

Sali lalu diasuh iya ngambi telu manuk sida ke di kemisi ke ba kurungan di baruh langkau.

Iya pan lalu nurun begiga ke buluh ruas ambi ke bisi di kena iya belulun ka asi pulut laban semua utai tu endang semina nya aja ke tau nyadi ke umpan kena nginti burung tiong munyi ku tusoi Apai Seumang Umang.

Iya meh tekerbak tawas pagi hari siti Apai Sali lalu beguai guai nyimpan semua utai ke umpan iya nya ke dalam raga serta mupuk nuju tisi umai sida Apai Seumang Umang nitih ke semaya seduai.

Datai iya ba tisi umai peda iya Apai Seumang Umang endang udah dugau dugau duduk nginsap ba pelasar dalam langkau umai sida.

Naka iya pengeransing ati Apai Sali sehari nya laban nadai patut enda ulih iya burung tiong enti nitih ku Apai Seumang Umang laban umpan kelalu mayuh dibai iya nginti burung tiong.

“Bah Akan ni bagi pun kayu ke bisi lubang alai burung tiong nya besarang.

“Padah ke aku meh ambi ke hari enda tebasau enggai ke hari nyau tinggi lagi.

“Takut ke iya siga lalu terbai ke bukai.”

Pia ku iya minta tunjuk ke Apai Seumang Umang.

“Eh Nyin iya Akan! Tang nuan nganti ditu dulu nganti nuan bisi ninga iya bemunyi baru nuan tau ngulur ke ginti nuan ngagai lubang pun kayu nya enggai ke burung tiong nya nadai dia.

“Aku ka ngiga lauk ke bukai asoh Indai Seumang Umang tadi,” pia ku saut Apai Seumang Umang ke endang udah be ema raga lalu mupuk ngejang ninggal ke Apai Sali kediri.

Nama agi deh lalu beguai guai Apai Seumang Umang ninggal ke Apai Sali ngelaung enggai ke di peda Apai Sali nuju ngagai pun kayu ke udah di tunjok ke iya nya tadi.

Datai ba pun kayu nya tadi dia Apai Seumang Umang lalu rauh rauh ngaga diri munyi burung tiong ke bisi ba kurungan di baruh rumah iya.

Apai Sali pan lalu beguai guai ga nuju lubang pun kayu nya lalu ngulur ka tali ginti iya ke dalam lubang munyi ku tusoi Apai Seumang Umang.

Keterubah iya Apai Sali ngulur ka telu manuk mansau ke umpan iya. Iya meh nyau abis semua telu manuk mansau ke bisi di bai iya nya lalu bedau ga burung tiong nya ulih iya.

Apai Sali lalu bejaku kediri meda burung tiong lalu bedau ulih.

“Bangar amat ga burung tiong tu lalu bedau ulih. Tu nama nyau abis telu manuk mansau ke di bai aku tu,” pia ku iya mutap.

Udah nya dinga iya tak nyaut ga Apai Seumang Umang ke belalai dalam lubang kayu nya nyaut ngelulu kediri nyadi burung tiong.

“Enggai agi aku beguna ka telu manuk mansau. Tak nya belama. penganan iri ka aku,” ku Apai Seumang Umang ke nyadi burung tiong dalam lubang kayu nya.

Nama lalu beguai guai ga iya ngulur ke ginti iya beumpan ke penganan iri ngarap ke ginti diri bulih burung tiong.

Iya meh nyau abis penganan iri nya ke umpan iya burung tiong pan lalu bedau ga ulih.

Naka iya pemedis ati tudah Apai Sali meda ginti diri lalu bedau bulih burung tiong, dia iya lalu bejaku.

“Ah deh. Naka naka ga burung tiong tu lalu enda ulih.

“Telu mansau enggau penganan iri ke umpan aku pan udah ga abis, tak bulu burung tu lalu bedau meh aku meda.

“Anang ke tak mai tubuh iya,” pia ku iya muchau bejaku kediri.

Sekali dinga iya tak nemu nyaut deh burung tiong dalam pun kayu nya munyi tu.

“Selalu tu belama ke diempa ka kena ngumpan kami. Uji penganan jala nya baru iya,” pia ku Apai Seumang Umang nyaut dalam lubang kayu ngelulu kediri nyadi burung tiong.

Ninga munyi nya lalu beguai ga tudah Apai Sali ngait ke penganan jala ba mata ginti iya lalu ngulur ke nya dalam lubang kayu ngarap kediri tau bulih nginti burung tiong.

Ulur ke iya sekali peda abis ga umpan nya di empa burung, tang burung lalu bedau ulih. Umpan pan nyau majak abis seabis.

Iya pan bejaku kediri barandau nengali ngeransi meda diri lalu nadai utai udah ulih.

“Apo naka meh burung tu lalu enggai ulih. Tu deh nyau abis semua umpan aku.

“Pagila nama enda utai kena ngumpan ti semua nya tak dikumbai burung tiong tu selalu diempa iya,” ku iya kutap kutap ngeransi diri ke lalu nadai utai udah ulih.

Sekali dinga iya lalu nyaut deh burung tiong dalam lubang nya.

“Buah pisang, dagin babi panggang enggau manuk panggang baru kami ka makai,” pia ku saut Apai Seumang Umang ke dalam lubang kayu nya ngelulu kediri nyadi burung tiong.

Apai Sali lalu mulai kediri ngagai langkau sida. Datai iya din, dia iya lalu ngasoh Sali nebang pisang sida lalu milih buah ti mansau aja.

Bini iya Enchelegit lalu diasuh iya nangkap manuk laban iya ka nangkap babi.

Ninga Apai Sali ngasuh ngereja utai munyi nya dia Indai Sali lalu nanya kapa guna iya ka bebunuh ke babi manuk nyangka bisi temuai ka datai ba rumah sida.

“Eh nadai nya utai di tanya ke nuan Indai Duat.

“Ka di kena aku nginti burung tiong ke umpan aku laban nya utai tau ke umpan ku burung tiong nya tadi lebuh aku ke nginti ba tisi umai sida Apai Seumang Umang,” pia ku saut Apai Sali.

Betampung minggu baru…

JOHN ADAM GILBERT ANYAI