KUCHING: Pengawa sembiang ba gerija endang seruran nitihka Atur Standard Pengawa (SOP) udah ditetapka Opis Pengerai Malaysia (KKM).

Tinjau Suara Sarawak ba sebuah gerija ba Kuching iya nya Gerija St. Basil meda tikas nitihka SOP chukup ngemantupka ati.

Kenu ku Vicar Gerija St. Basil Rev. Father Jose Jol Endru, piak gerija agi natak penyampau tubuh datai sembiang laban agi nangika pengerekai igi penyakit Covid-19.

“Genap iku sida ke datai endang dilalau nitihka SOP ti udah ditetapka perintah enggau KKM.

“Kediatu, kami agi natak penyampau tubuh sida ti sembiang naka 100 iku aja nyengkaum bala kami ti meri servis.

“Nya kebuah kami nyadung kad ti bisi lumur awakka nyadi tikit kena sida tama ke gerija minggu dudi.

“Kelimpah ari nya, di Gerija St. Basil kami ngatur tiga kali servis besembiang iya nya pukul 6.45 pagi ungkup servis English, 9.00 pagi ungkup servis Iban enggau 5.00 lemai ungkup servis Bahasa Malaysia,” ku iya lebuh dirandau Suara Sarawak pengudah ngatur servis sembiang di Gerija St. Basil ditu, pagi tadi.

NERANG… Rev Jose Jol Endru lebuh ditanya Suara Sarawak ba Gerija St. Basil ditu, pagi tadi.