KUCHING: Temegah meda produk berau bansa Iban bisi dijual ba sebuah kedai nyual minyak kerita entarabansa nyadika peransang ngagai Imelda Bragie nyingkang jauh agi ba dunya dagang pemakai menua tu.

Imelda numbuhka Berau by Benak Raya nengah pelasar dagang produk berau ari Sri Aman dipilih bedagangka produk iya ba semua kedai Shell dipilih.

“Aku diplilih nyadi ikon orang dagang ba pekit ‘Shell Live Wire Top Ten Innovator 2020’ dikena meransang sepuluh iku orang dagang ti bepekit nya taun tu.

“Nyadi, aku diberi bepeluang nyual produk Berau by Benak Raya ba semua kedai minyak Shell dipilih selampur Sarawak enggau Semenanjung Malaysia,” ku iya lebuh dirandau Suara Sarawak, kemari.

Ku Imelda, pengawa tu meri reti chukup besai ngagai iya laban dipilih ngarika Borneo ngagai tikas entarabansa.

DIAKU RENGGAT ENTARABANSA… Sekeda ari produk berau ditengkebang Imelda.

“Pia mega, pemujur aku ulih meri peransang ngagai pemekit bukai ba selampur dunya.

“Ba aku, tu ukai pekara ti mit laban aku dipilih sida Shell ba London.

“Nya meri reti aku ulih ngelakuka produk Berau by Benak Raya ngagai menua luar,” kenu ku iya gaga ati.

Kelimpah ari nya, Imelda ngarapka dagang produk berau tu terus mansang sereta meransang nembiak rumah panjai ngaul diri dalam dagang.

“Kitai meh modal insan ti beguna ngagai pemansang ekonomi komuniti ari menua pesisir.

MANAHKA PENGERAI… Produk digaga ari berau enggau techal engkabang.

“Agi mayuh pemansut asal ba kampung ti bedau diangkat nyadika dagang.

“Aram kitai sama ngemansangka ruang bilik diri, maju seikas enggau sida ba mengeri,” ku iya.

Kediatu, produk Berau by Benak Raya berengkah dijual ba Shell Select (Maple Avenue Enterprise) di Tabuan Jaya sebedau ngerembai ngagai kedai Shell dipilih ti bukai.

Entara barang dijual dia nyengkaum sabun berau, berau mirah, berau chelum, berau burak, scrub mua enggau ke bukai.

Imelda mega siku ari penyereta ngarika Malaysia ba pekit ‘Shell Live Wire Top Ten Innovator 2019’.

Inovasyen produk iya nyadi kelai sereta meri pangkaba pengawa ngintu rampa menua lebuh iya mujur ngaga ‘straw’ dikena ngirup ai ari berau.

Berau entara pemakai ti nyadika pun pengidup bansa Dayak kelebih agi bansa Iban ba selampur Sarawak sereta sida ti diau ba rumah panjai ngemeranka pengawa bumai betaun.

TEMEGAH… Imelda nyadi ikon ‘Shell Live Wire Top Ten Innovator 2020’. 

 

PUN PENGIDUP… Pengawa bumai betaun sigi dikemeran raban bansa Iban kenyau ari menya.