KUCHING: Program Nyemelaka Rega diperati ulih mantu komuniti menua pesisir ngasaika rega komoditi besai sebaka ba mengeri.

Menteri Dagang Dalam Menua enggau Pekara Penguna (KPDNHEP) Datuk Alexander Nanta Linggi madahka perintah udah melanja bejuta ringgit ungkup program nya ti dipejalai dalam taun 2009.

Ku iya, nengah program Nyemelaka Rega tu, raban B40 ulih meli barang diguna laban enda ditating ungkus perengka pengangkut.

“Program tu mujur laban ninting taun perintah udah melanja bejuta ringgit ba selampur menua, kelebih agi ngagai Sabah enggau Sarawak laban enda mayuh jalai alun maya nya.

“Diatu, mayuh agi jalai alun deka digaga, rega barang pemadu diguna nyangka murah agi kelimpah kitai ulih ngenyemakka takah ekonomi entara peranak.

“Tang lebuh bisi bida rega besai entara menua pesisir enggau mengeri, aku pechaya program tu deka ditampung,” ku iya ba aum media pengudah bejadika Program Citarasa Malaysia @ Bumi Kenyalang 2020 di Vivacity Megamall, Kuching kemari.