SARATOK: Agih belanja penyampau RM400,000 ari Perintah Besai nengah Opis Menteri Pelajar (KPM) dikena nyeleti sekula menua pesisir ba menua tu.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju, madah, tu berita chukup manah kelebih agi ngagai kitai di Sarawak ti begunaka agih belanja besai bejalaika pengawa nyeleti tauka ngaga baru begunan sekula.

Ku iya, entara sekula menua pesisir sitak Parlimen Saratok bukai bela ampit nerima agih belanja nya iya nya SMK Kalaka di Roban kelimpah ari SMK Saratok empu.

“Pekara tu nunjukka penyiru enggau pemanah KPM ti dipegai Mohd Radzi Jidin ti seruran ngemeratka pekara diguna nembiak sekula.

“Sekula repuk entara penanggul besai ditapi tebal agi sekula di menua pesisir enggau menua ulu Sarawak.

“Nya kebuah kitai berasai chukup gaga nerima berita manah tu laban udah lama nganti penanggul tu teputar meruan,” ku iya.

Ali mansutka jaku nya ba Pengawa Nyuaka Kereban ICT Sekula Sekondari (SMK) Saratok ditu, pagi tadi.