TAUN 2020 tu mayuh penanyi kitai Iban merambu ngeluarka album enggau single baru ungkup bala peminat sida.

Tang ketegal pandemik Covid-19, mayuh pengawa enggau perambu tejanggal laban berundingka pengelikun diri kelimpah ditagang mindah ke bukai.

Penanyi Joseph Dresa ti sebedau tu chukup tebilang enggau lagu Bepangan Entara Menua bepadu nyawa enggau Joyce Menti deka ngeluarka album baru ba taun 2020 tu.

BERITA MANAH

Serak tu, iya datai baru enggau album ti deka keluar enda lama agi ungkup bala peminat ti lama udah nganti sereta lelenggauka sada nyawa iya.

Ku Joseph, album baru tu bisi beberapa buah lagu baka lagu Ganti Ti Menyana, Joget Mua Aku Te Malo, Wai Rumah Seberai, Penguji Ati enggau Indu Landa.

Lagu tu mega ku iya, bebida ari lagu ti udah dikeluarka sebedau tu kelimpah ranchak agi ungkup bala peminat iya.

“Ke bendar iya, lagu tu deka tembu enggau deka dikeluar tang penekul beduduk ari penusah ke nyadi ba menua tu ngujungka album nya laun pansut ari perambu asal.

“Taja pia, bala peminat anang irau laban album nya deka dikeluar udah tu,” terang iya.

RANCHAK… Gambar Joseph lebuh ngerikod lagu gawai enggau GPRS.

LAGU TEBILANG

Lagu Wai Rumah Seberai entara lagu pemadu tebilang dalam album nya ti suah ditebah ba radio.

Nambahka nya ku Joseph, lagu nya diatu udah dipeda 234,0000 iku nengah Yotube Channel Maskuta Motion Picture Sdn Bhd.

Sebedau tu, iya kala melakun ba Telemovie Bungau enggau Mujap nyadi Kapitan Kinchong.

Udah nya, Joseph lalu nguji nasip ngaul diri ba dunya pemerindang ba industri muzik Dayak ba menua tu.

Nama iya majak pegari pengudah nyadaka lagu Sanggup Begadai Tanah enggau Bepangan Entara Menua bepadu nyawa enggau Joyce Menti.

Bepun ari lagu nya, nama Joseph Dresa majak dikelala enggau suah dikangau merindang bala peminat.

NEMPA NAMA

Lebuh ngelansa pasal pejalai ba dunya pemerindang, Joseph enda nyangka iya ulih datai ba tikas ke diatu.

“Sukung bala bakih ti mai aku datai ba tikas diatu enggau ba dunya pemerindang kelimpah ari sukung kami sebilik.

“Sida nyadika peransang aku seruran ngeluarka lagu ke manah sereta nitihka tiun dikedeka bala peminat.

Joseph ti asal ari Simunjan mega kala dipilih nyadi siku ari finalis Anugerah Carta Sapa Juara (ACSJ).

Nerang silik, Joseph madahka iya kala nyadi finalis Final ACSJ ke 5 mai lagu Bepangan Entara Menua (komposer Joseph empu) enggau ACSJ iya nyadaka lagu Ganti Ti Menyana (komposer Harrython Suring William.

JEREKI DUNYA PEMERINDANG

Ngelansa pejalai ba dunya pemerindang, Joseph madah keterubah iya ba dunya pemerindang tu lebuh diambi kompeni GPRS.

“Pengudah nyereta GPRS, aku lalu rekoding kompilasi lagu gawai bepadu nyawa enggau Lakuang Ading.

“Udah nya, piak GPRS bisi ngaga telemovie Bunyau enggau Mujab nurun belelang.

“Sida ngambi aku nyadi pelakun tambah ba telemovie nya nyadi Kapitan Kinchong.

Bepun ari nya ku iya, nama iya majak dikelala enggau peminat ba menua tu.

Telemovie nya mega nerima timbal ke manah ari bala peninga laban nusui pasal pengidup kitai bansa Iban.

“Diatu aku enggau kompeni Maskuta Motion Picture Sdn Bh begulai enggau penanyi bukai baka sida Joyce Menti.

“Joyce mayuh mantu aku ba dunya pemerindang tu enggau suah promo aku lebuh bisi merindang.

“Joyce mega suah mai aku sama merindang ngambika lagu aku majak dikelala enggau dikerindu bala peminat,” terang Joseph.

Ungkup penerang semua, album keterubah Joseph suba iya nya Sanggup Begadai Tanah ti dikeluarka kompeni GPRS.

PEJALAI NYADI PENANYI

Sekumbang nyadi penanyi ba menua tu, Joseph madahka iya napi mayuh pemar ngambi ulih ngangkatka diri sebaka enggau penanyi bukai ba menua tu.

“Pemar diasaika aku diatu meri peransang ngagai aku ngambi ransing agi ngaga beamcham lagu nitihka tiun dikedeka bala peminat.

“Penguji tu mega ngeringka semengat aku ngambi seruran ngemajuka diri sebaka enggau orang bukai.

Nya kebuah ku Joseph, iya seruran bejimat lebuh nengkebang lagu ngambika lagu nya dikerindu bala peminat.

“Kadang kitai enda nemu lagu ti dipeda kitai ‘simple’ aja ulih meletup enggau bulih views ke mayuh.

BEPADU NYAWA… Lagu Bepangan Entara Menua suah didinga ba radio Iban di menua tu laban Joseph enggau Joyce Menteri ngembuan patah nyawa ke chukup manah.

NYINGKANG KE MUA

Taja pia ku iya, industri muzik Iban diatu makin maju nitihka singkang industri muzik bukai kelebih agi ba Semenanjung Malaysia.

“Muzik kitai diatu udah jauh berubah sereta nitihka singkang industri muzik bukai.

“Tang, kitai enda tau muai lagu lama laban enti nadai ke lama, nadai mega ke baru.

Kebuah pia ku iya, genre lagu siku-siku penanyi bebida laban kitai mensia ngembuan patah nyawa enggau pengelebih diri.

“Utai pemadu beguna ditu, kitai meseti nitihka pengelebih diri enggau anang nundaka orang bukai.

Berebak enggau nya, Joseph meri besai terima kasih ke sukung bala bakih, sida sebilik enggau bala peminat.

“Sukung sida tu meransang aku seruran ngeluarka lagu dikerindu bala peminat kelebih agi lagu ranchak.

“Bala peminat semua, terima kasih laban kita udah nyukung pejalai aku ba dunya pemerindang ngelama tu.

“Ngarapka semua lagu disada aku ulih diterima enggau merindang ati semua kita.

“Sukung mih industri muzik kitai di menua tu!,” ku Joseph nyimpul randau enggau Suara Sarawak.