KUCHING: Bisi 465 buah tadika Kemas enggau 19 buah tadika peribit di Sarawak apin dibuka.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah, madah, tadika peribit deka ngepunka pengawa kena 15 Julai seraya tadika Kemas deka berengkah dibuka kenaka 20 Julai nangkan nya.

“Bala operator tadika agi ngatur sereta nentuka palan endur bala nembiak awakka ulih nitihka Atur Standard Pengawa (SOP) enggau meruan baka ngeripih bangku, mija, bilik isolasyen, singki enggau ke bukai.

“Taska di Sarawak endang udah dibuka seratus peratus lalu 20 Julai tu, taska enggau tadika di menua tu dibuka penuh,” ku iya.

Fatimah madah, mensia mayuh anang kelalu irauka bala anak enda nemu nyaga takah enggau pangan diri.

“Anang ngumbai sida enda meretika SOP laban bala nembiak meri kerejasama rat enggau ngasika jaku pengajar sida lebuh kami matau endur nya.

Fatimah bejaku munyi nya lebuh ditanya pemberita ba aum media i-Suri KWSP di Bengunan Baitulmakmur ditu tadi.