SARATOK: Peranak menua pesisir kelebih agi sida ke diau ba rumah panjai patut nyikap diri ngena penemu bekaul pengelikun enggau chara nyeliahka diri ari penusah angus.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju, madah, penemu pemun pasal pekara pengelikun beguna amat dikena napi penusah ke tau nyadi sebarang maya.

Ambika chunto ku iya, tebal agi penusah angus rumah panjai bepun ari pengilap enggau penanggul teknikal baka sut tali karan ngujungka peranak lenyau rumah enggau keresa.

“Ukai ngajih rangkang ngachuk mata tang kitai patut nyikap diri ngena penemu, abis nadai nemu chara bekenaka kereban pengerara api.

“Kitai mega patut ngajar bala nembiak anang bemain enggau api ti tau ngasuh penusah angus nyadi kelimpah enda nejuka sida ke tuai diau kediri ba rumah.

“Nya kebuah aku ngasaika program ngajar chara ngerara api ngena kereban pengerara api patut dipejalai ba genap rumah panjai selampur menua nentuka kitai bela disikap ngena penemu ke patut,” terang iya.

Ali mansutka jaku nya rambau Program Nemuai Seraya Nyuaka Bantu Kereban Pengerara Api ba Rumah Ellai, Nanga Entaih di Ulu Krian, ngalihari kemari.

UNGKUP PENGELIKUN… Ali ngemata pengawa nyuaka enam unit kereban pengerara api ungkup peranak Rumah Ellai.