KUCHING: Siti kes positif baru Covid-19 dirikod ba Pelilih Bintulu seharitu ngujungka penyampau kes positif Covid-19 di Sarawak niki 572 kes.

Sapit Kepala Menteri ti mega Chaiman Komiti Penyaga Penusah Ngenyit Nengeri (JPBN) Datuk Amar Douglas Uggah Embas, madah, kes ke-572 tu siku nembiak indu beumur 22 taun peranak menua tu ti baru pulai ari United Kingdom kena 1 Julai.

“Iya tama nengah penerebai ari United Kingdom ke Kuala Lumpur kena 1 Julai lalu tama ke Sarawak nengah Padang Bilun Bintulu 3 Julai.

“Datai ba Bintulu iya lalu kuarantin diri empu,” ku iya ba aum media nengah facebook tadi.

Tambah Uggah, bisi tiga kes udah suman enggau pansut ati sepital di Bintulu dirikod kemari ngujungka penyampau kes suman enggau pansut ari sepital bisi 549 iku.

“Enam iku agi berubat ba wad isolasyen sepital lalu penyampau kes pemati ketegal Covid-19 mengkang 17 iku.

“Kelimpah ari nya, bisi 61 iku pesakit agi dipatau (PUI) dirikod ke alai siti kes agi nganti pemutus makmal.

“Naka diatu, status zon kuning agi sebuah (Kuching) lalu zon gadung udah manggai 39,” ku iya.