BINTULU: Projek Nyeleti Rumah Miskin Sarawak (PPRMS) nyadi inisiatif Perintah Sarawak mantu rayat seranta diau ba rumah lantang agi.

Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek), Datuk John Sikie Tayai, madah, perintah keran nentuka rumah orang ti patut dibantu ulih diseleti enggau meruan.

Ku iya, Kepala Menteri Abang Johari Tun Openg empu beratka penanggul ditapi rayat ti merinsa idup diau ba rumah ti udah repuk, jai kiba kanan.

“Tuju kitai deka nyendiaka rumah ti likun enggau lantang agi ngagai raban diselinting.

“Nengah PPRMS tu, mayuh rumah raban seranta udah diseleti lalu meri pengelantang ngagai sida,” ku iya

Sikie ti mega Adun Kakus mansutka jaku nya lebuh ngabas pejalai projek PPRMS di Rumah Nai enggau Rumah William Badi di Ulu Arip, tadi.

Nambakka nya ku iya, projek tu mega nunjukka penyiru Perintah Sarawak mantu rayat kelebih agi sida ke diau ba menua pesisir.