ROBAN: Siku pengereja kunterik ari Sri Aman bebadi nyawa pengudah motosikal iya ensuruk baruh treler sawit tadi.

Penusah bebadi urung pukul 2.05 lemai ba tiku jalai semak Kampung Mundu di KM1, Jalai Roban – Saratok.

Niang benama Nur Alif Aidil Roslan, 26 taun, dipadah mengkang ba mua treler nya lalu dipirit.

Ketuai Polis Pelilih Saratok, Deputi Superintendan Mordani Tanin, madah, adres rumah niang ba Taman Gamang, Jalai Brayun ditukuka parai tekala nya ba endur penusah nyadi ari raban perubat Klinik Pengerai Roban.

“Asil pansik tumu polis, niang dipelaba tama ngagai jalai sepiak berindik ari bekau tayar ba atas jalai lebuh nengah tiku kiba,” ku iya ba penerang nya.

Ku Mordani, niang ti balat bakal ba kaki, dada enggau pala benung ba rantau jalai ari simpang Roban nuju pasar Roban.

Mordani madah, bangkai niang udah dibai ngagai Rumah Bangkai Sepital Saratok ungkup atur bukai lalu buntas pansik deka dipejalai pagila, Hari Empat.