MIRI: Siku lelaki kena ukum RM3,000 ba Kort Majistret ditu pengudah ngaku salah nyamah bini iya minggu nyin tadi.

Orang kena tuduh beumur 49 taun ngaku salah pengudah tuduh nya dibacha ba mua Majistret Leona Dominic.

Bepelasarka tuduh, iya didawa sengaja nyamah bini ngujungka bisi bekau nemaram ba mata kiba.

Kenu ku penerang kes, lelaki nya dipelaba ngereja penyalah ba sebuah rumah di Kampung Kejapil, Bekenu ditu urung pukul 8.30 pagi, 30 June tu tadi.

Kes didawa di baruh Seksyen 323 Kanun Keseksaan dibacha begulai Seksyen 326(a) akta sama ti mai ukum jil abis lama dua taun tauka ukum abis mayuh RM4,000 tauka kededua sekali enti dituku salah.

Kort mega ngasuh orang kena tuduh dijil lima bulan enti puntan ngisi ukum nya.

Sebedau ukum diletak, iya minta ukum nya lempung agi laban nya penyalah keterubah dikereja kelimpah ari agi bisi anak mit.