BINTULU: Siku deriba lori tangki bebadi nyawa sepengudah lori ke ditepan iya labuh ngagai lebak ba Kilometer 48, Jalai Bintulu-Tatau, pagi tadi.

Penusah nyadi urung pukul 10.15 pagi ngujungka Joshua Suen Kasin,44, bebadi nyawa ketegal ti balat bakal ba pala enggau tubuh.

Kepala Opis Polis Trafik Sarawak Superintenden Alexson Naga Chabu madahka tudah niang ke bebadi tu asal ari Rumah Legam, Lubok Kelumpu Spaoh.

“Penusah nyadi lebuh perengka pengangkut (lori) ke dibai nya tadi dalam rantau jalai ari Tatau ke Bintulu,” ku iya ba siti penerang berita ditu tadi.

Ku iya perengka pengangkut ke dikena nya tadi tepawah lalu labuh ngagai lebak kira 20 meter peninggi.

“Tudah niang balat bakal ba pala lalu madamka seput tekala nya,” ku iya.

Kes dipansik nitihka Seksyen 41(1)Akta Pengangkutan Jalan 1987.

SINU… Piak bomba nguji ngidupka tudah pengudah deriba nya mujur dibatak ari lori.