SEBUYAU: Perintah Sarawak ngagihka belanja RM450 juta dikena ngemujur 21 projek rayat iya nya bekal ai ba Bagi Menua Samarahan ti disadang tembu, ujung taun 2021.

Kepala Menteri Datuk Patinggi Abang Johari Tun Openg madah, penanggul bekal ai nya penanggul ke lama udah nyadi ba Bagi Menua Samarahan lebuh pekara nya deka diputar nengah sistem grid ai menua.

“Sistem grid ai deka digaga meruan agi nengah Jematan Batang Samarahan enggau Jematan Batang Sadong digaga bepun ari Kuching ngagai Sebangan.

“Projek tu mungkur pengawa ngaga sambung paip baru, tangki tinggi, sistem paip ai sereta ngemanah tangki ai,” ku iya.

Abang Johari mansutka jaku nya ba Pengawa Bejadi enggau Pejalai Ngabas Projek Bekal Ai Bagi Menua Samarahan, ditu kemari.

Ku Abang Johari, penembu projek tu pulaika pemanah ngagai 85,000 iku peranak ba sitak Asajaya, Sadong Jaya, Sebangan, Sebuyau enggau Simunjan.

“Pengawa nyambung bekal ai ngagai sitak tebing sungai sebedau tu di baruh bidang kuasa Opis Menteri Menua Pesisir lebuh belanja nya enda tetap.

“Ujung iya, sama baka dipadahka Tok Nan, semina orang Sarawak aja ulih nyaga Sarawak.

“Nya kebuah, aku ngiga belanja ungkup kereja nyambung ai ngagai sitak menua pesisir,” terang iya.

Abang Johari nyemetak madah, Perintah Sarawak meri agih belanja ngambi negika nasip rayat lebuh bisi parti politik madahka Sarawak deka bankrap.

“Tang aku enda ibuhka utai nya kelimpah bisi piak madahka aku semina pintar bejaku aja ba media rama.

“Tang diatu, aku udah nunjuk ngagai sida, aku ukai semina pintar bejaku lalu aku udah ngamatka semaya meri bekal ai ngagai peranak ditu,” terang iya.

Nambahka nya ku Abang Johari, iya ngagihka belanja RM2.8 bilion ngagai Opis Ai Menua Pesisir (JABL) ba timpuh tiga taun ngambi nyikap selampur Sarawak enggau bekal ai beresi.

Taja pia ku iya, sistem ai menua deka manah agi pengudah Jematan Batang Lupar tembu ila.