Pengudah adat Melah Pinang tauka beterang ba mua mayuh nyadi orang ke begelar pengantin pan sah ngempu pangan diri nyadi laki tauka bini.

Bekau ari nya bini tau laki tu tadi enda tau enda angkun ngagai entua sekalika nya kaban ipar tuai tauka biak ari iya. Dalam adat Iban, entua entara orang ke pemadu dibasa lalu enda tau disebut nama laban nya ngelai basa besai menantu ngagai sida.

Munyi ku jaku orang tuai kelia, pemali nyebut nama entua tu tau ngasuh busung, reti nya tau ngasuh kitai berasai mar sereta pedis ngangkatka diri lebih agi ngulihka penatai pemisi ungkup ruang bilik.

Ambika chunto, enti baka agi bumai kelia. Orang ti busung sida deka pedis bulih padi lalu enti dipusin ngagai pendiau pengidup kemaya hari nyangka enda mujur ba sebarang pengawa ti dikereja. Nya mih pangka pemesai reti menantu enda tau enda bebasaka entua.

Nitih jerita tuai mega ke ditampung ari mulut ke mulut, dia pemali tu dipadah bepun ari ajar siku tuai Iban ke benama Sengalang Burung ti enda ngasuh bala menantu nyebut nama iya ba menua sida.

Nyadi kenu ku jerita, enti naka orang nya agi mentua ke iya dalam serak tiga kali petunggal enggau apai indai bini tauka apai indai laki iya empu. Nyadi serak keempat entua iya nya dikumbai entua basa.

Pia mega, kelai penyiru adat tuai kitai Iban tu mega, dia ipar enti sida nya biak ari laki tauka bini nyadi sida tu dikanggau adik. Enti sida tuai nyadi sida dikangau ika. Pia mega, entua ke lelaki lalu dikangau apai tauka aya lalu entua indu dikangau indai tauka ibu. Taja pia, kemaya hari tu kangau tu mayuh nitih kangau ari sepiak laki tauka bini nya empu nitihka penyiru diri, bisi nya agi dikangau indai tauka apai. Tang reti tetap sebaka iya nya kelai basa ngagai bala entua.

Pengudah belaki bebini mega, kitai enda tau enda ngembuan ati ke manah sereta nelap enggau semua orang. Nyadi orang ke endang udah bisi agih nguai ngagai laki tauka bini sida enda tau berumban magi pendiau diri ba maya ke apin patut beserara laban pengawa nya semina ngemedis diri empu. Kelia ulah ti berumban kediri baka tu dikumbai orang nadai basa tauka enda nemu adat.

Kemaya hari tu, enti kitai nguing ngagai ajar pengarap Kristian baka ni kitai ke udah nirika rumah tangga deka ngetanka kaul ti manah enggau kaban belayan lebih agi entua enggau bala ipar?

Saut nya ulih diperati kitai ba bup Kolosi 3 :12 ti madah “Rasukka…penelap, ati ti baruh, ati ti nemu nunduk ngagai pangan diri enggau ati ti liat.” Reti nya jadi melaki bini kitai ngepunka siti ruang bilik ti baru. Taja pan nuan sayau sereta bebasaka apai indai, tang diatu pangan nuan orang tu patut dikemeratka nuan.

Sekeda kaban belayan nuan tentu tusah deka nerima pekara tu. Tang, ajar Bup Kudus ulih nulung nuan ngetanka kaul ti manah enggau kaban belayan sereta enggau pangan nuan empu.

Bisi dua chara kitai nyaga kaul enggau pangan diri lepas jadi melaki bini awakka seruran bisi basa ngagai bala entua sereta ipar. Kesatu semampai ngetanka runding ti manah ngagai kaban belayan. Udah nya kedua padah enggau nyemetak.

Bepelasarka ajar Bup Kudus diterang munyi tu : “Bebasaka apai indai nuan.” (Epesus 6 :2) Enda ngira berapa umur nuan, nuan patut bebasaka apai indai nuan. Keingatka, pangan nuan mega patut betatika apai indai iya. “Pengerindu nya…enda kepapas,” nya alai anang enda nyamai ati meda kaul pangan nuan enggau sida sebilik. – 1 Korint 14 :4, Galatia 5 :26

Ari batang ajar nya tadi, nama utai ke patut digaga nuan? Keterubah iya nya anang nyebut munyi tu, “kita sebilik selalu ngemaruh tauka bejai aku” sereta “Indai nuan enggau meda aku”. Uji asaika baka ni asai ati pangan nuan ninga jaku munyi nya.

Udah nya, pasal jaku ti meseti dipadah enggau nyemetak. Bepelasarka Bup Kudus “Lelaki ninggalka apai indai iya, lalu begulai enggau bini iya, lalu seduai nyadi siku.” (Pemungkal 2 : 24) Maya nuan kawin, apai indai nyangka ngasaika sida agi ngempu tanggungpengawa ngagai nuan, nya alai sida engka deka masuk champur ba pengidup seduai melaki bini.

Seduai ulih nentuka naka ni sida ulih masuk chamour, lalu padahka pasal utai tu ngagai sida enggau manah. (Jaku Dalam 15 :1) Pendiau nuan ke baruh ati, nelap enggau sabar deka nulung nuan bisi kaul ke manah enggau kaban belayan, lalu terus “enggau pangan diri dalam pengerindu.” (Epesus 4 :2)

Nangkan nya, nama ti patut digaga nuan? Enti nuan irau enggaika kaban belayan kelalu masuk champur ba pengidup seduai, berandau mih pasal utai tu enggau pangan nuan maya seduai lantang. Berandau manah lalu besaup mutar pekara tu.

Berebak enggau nya, nuan patut nemu asai ati enggau peragam runding apai indai. Sida ukai sengaja deka ngachau ruang bilik kitai. Sida sayauka kitai. Sida nyangka irau meda kitai baru ngidupka diri. Sida nyangka ngasaika diri dibuai. Tang enti nitihka ajar Bup Kudus sereta berandau enggau manah pasal utai tu, kitai ulih masa apai indai lalu enda ngerusak ruang bilik kitai.

PENGHULU RUAI
ALVESTER BIGOL