KUCHING: Kuching sehari tu ngerikod dua kes baru positif Covid-19 lalu ngujungka bagi menua tu pulai ngagai zon kuning baru pengudah sehari ditela zon gadung.

Komiti Penyangga Penusah Ngenyit Nengeri (JPBN) madah, kededua kes ti dirikodka ba pelilih Kuching nya kes berampit ba menua dalam tu.

“Tu ngujungka kes positif Covid-19 ba Sarawak naka diatu bisi 575 kes.

“Kes keterubah iya nya ke-574, siku lelaki peranak menua ti diperubat ba Sepital Besai Sarawak (SGH) kena 5 Julai tu tadi laban sendat seput enggau berasai lemi tulang kenyau ari 1 Julai tu tadi.

“Iya dipasuk ngagai wad isolasyen enggau siku pesakit diabetes melitus sereta bisi penanggul darah tinggi,” ku JPBN nerang.

Ku penerang nya, lelaki nya ditukuka positif kena 9 Julai lebuh nerima pemutus makmal RT-PCR Covid-19.

“Kes kedua iya nya ke 575, siku indu peranak menua ti gawa ba sebuah serikat konsultan kejuruteraan di Kuching.

“Iya udah diperubat ba SGH kena 7 Julai tu tadi enggau dipasuk ngagai wad indu laban sakit dada enggau batuk rangkai,” terang iya.