SEBUYAU: Endang adat dalam Parti Pesaka Bumiputera Bersatu (PBB) ngambi seruran meri peluang ngagai orang biak nyadi ketuai dalam parti nya.

Kepala Menteri Datuk Patinggi Abang Johari Tun Openg mansutka jaku nya lebuh dipinta nyaut pasal Kaban Kunsil Nengeri (Adun) Kalaka, Datuk Abdul Wahab Aziz ti nyurutka diri maya Pengawa Bepilih Nengeri Ke-12 (PRN-12) ila.

“Aku meri terima kasih ngagai Wahab laban nyurutka diri enggau tu mih adat dalam PBB laban nemu meri peluang ngagai rebak biak.

“Aku ngarapka komponen parti bukai dalam Gempung Parti Sarawak (GPS) deka ngereja pengawa ke sama,” ku iya ba Pengawa Bejadi enggau ngatur pejalai ngabas projek bekal ai Bagi Menua Samarahan, ditu kemari.

Abang Johari ti mega Chairman GPS madah, orang ti deka nyilih penuduk Wahab deka diperunding tang enda mantaika pekara tu silik agi.

Ngelansa pasal PRN12, Abang Johari madahka pekara nya agi lama.

“Pengawa bepilih agi lama baka pemayuh tanjung ba Sebagan tu,” ku Abang Johari.

Kena Hari Tiga tu tadi, Wahab ti mega Adun Kalaka pengelama enam penggal nyurut diri pengudah baum begulai enggau Komiti Pampang PBB di Saratok.