SEBUYAU: Perintah Sarawak ransing mutarka penanggul besai ti ditapiika peranak ngelingi sitak tu.

Menteri Muda Infrastruktur enggau Pemansang Palan Penyangkai Kapal Sarawak, Datuk Julaihi Narawi madah, sitak nya napi penanggul ai tasik ngelumpa enggau suntuk bekal ai beresi.

“Ai tasik ti ngelumpa tu ngujungka penanggul ampuh bah enggau bah tunggal nyadi ngujungka ai masin tama ngagai sitak nya enggau ai tu deka ngerusak utai tanam.

“Pia mega, benteng tasik ti digaga ba sitak Sebuyau, Asajaya nyentuk Sebangan udah rusak ketegal ai nya ngelumpa,” ku iya.

Julaihi mansutka jaku nya ba Pengawa Bejadi enggau Pejalai Ngabas Projek Bekal Ai ba Bagi Menua Samarahan ti dipenyadi Kepala Menteri Datuk Patinggi Abang Johari Tun Openg di Ferry Ramp Lama ba Seruyuk, ditu kemari.

Pia mega, suntuk bekal ai beresi mega nyadi penanggul ngagai peranak ba sitak nya kelebih agi ba Sebuyau, genturung pendiau ba Sebangan, Ladong, Seruyuk enggau ke bukai

“Penanggul tu udah nerima perati Abang Johari lebuh penanggul tu dibantai ngagai Perintah Sarawak.

“Kami mega berasai gaga laban iya mendingka penanggul diasaika rayat renggat baruh.

“Seharitu (9 Julai), kitai ulih ngemata pengawa masang paip ‘state water grid’ ari Kuching, Kota Samarahan, Asajaya enggau Sadong Jaya.

“Projek tu nunjukka Perintah GPS dipegai Abang Johari nemu penanggul kitai ba sitak menua pesisir enggau tebing sungai,” ku iya nyemetak.

Terang Julaihi, ‘state water grid’ digaga ngambi mutarka penanggul timpuh panjai nitihka peminta bekal ai beresi ba sitak tu.

Pekara nya mega ku iya, deka nyadi sejarah lebuh bekal ai chukup ila.

“Kelimpah ari nya, penanggul parit alit mega diputar nengah Ejensi Pemansang Kandang Menua Begulai Samarahan (IRSDA) laban agih belanja deka diberi ari ejensi nya kelebih agi maya musim ujan bangat,” ku iya.

Ku iya, agih belanja nya dikena ngaga benteng tasik ba sitak tu ti udah dikemendar di baruh IRSDA.

“Pengawa ngaga benteng nya mungkur sitak Asajaya, Sadong Jaya, Sebangan, Sebuyau ngagai Sungai Rama.

“Projek benteng tasik nya udah ditinda Perintah Sarawak, siti ba Asajaya enggau dua agi ba sitak Sebangan enggau Sebuyau.

“Sitak bukai deka ditinda ujung bulan tu,” ku iya.