SEBUYAU: “Kitai enda ngelaban Malaya (Perintah Sarawak enda ngelaban Perintah Besai) tang dekaka pemansang ti meruan agi, pia ku Kepala Menteri Datuk Patinggi Abang Johari Tun Openg.

Ku iya, semua polisi dibantaika Perintah Sarawak nya nitihka atur Sempekat Malaysia 1963 (MA63) nyengkaum bayar lima peratus chukai jual 9SST) ba produk petroleum digali di menua tu.

“Kitai bisi hak ba industri minyak enggau gis ba menua tu.

“Nya kebuah kami mai Pteronas ngagai kort laban sida enggai mayar SST 2019 lalu diatu, pekara nya diputar enggau manah,” ku Abang Johari nyemetak madah.

Abang Johari mansutka jaku nya lebuh bejadi enggau ngatur pejalai ngabas projek bekal ai Bagi Menua Samarahan, ditu kemari.

AUM PEMBERITA…Datuk Patinggi Abang Johari Tun Openg begulai enggau Datuk Julaihi Narawi, Datuk Stephen Rundi, Datuk Abdul Karim Rahman Hamzah, Adun Sadong Jaya, Aidil Lariwoo enggau Kaban Parlimen Batang Lupar Datuk Seri Rohani Karim pengudah pengawa nasih tananh ngemanah bekal ai ba sitak Sebuyau kemari.-Gambar Ghazali Bujang

Ku Abang Johari, belanja ari asil SST nya dikena ngemansang peranak ba genturung pendiau lebuh sida apin disikap enggau perengkaguna pemun.

“Kitai ke bendar kiruh nyambung paip, ngaga jalai alun enggau jematan ba Sarawak, ukai berebut deka mangku pengawa nyadi Menteri Besai.

“Tang orang din (parti penyakal ba Semenanjung Malaysia) berebut deka mangku pengawa nyadi Menteri Besai nyengkaum chalun ari Sabah,” terang Chairman Gempung Parti Sarawak (GPS) nya.

Nambahka nya ku iya, Perintah Sarawak dekaka Perintah Besai ti tegap lalu nya kebuah, GPS nyukung Tan Sri Muhyiddin Yassin nyadi Menteri Besai.

“Keterubah suba, endang amat kami nyukung Tun Mahathir Mohamad nyadi Menteri Besai tang iya ngemaduka diri mangku pengawa nya.

“Nya kebuah, kami lalu nyukung Muhyiddin dataika seharitu,” tandu iya.

Sama datai Menteri Utiliti, Datuk Stephen Rundi Utom, Kaban Kunsil Nengeri (Adun) Asajaya Datuk Abdul Karim Rahman Hamzah, Adun Sebuyau Datuk Julaihi Narawi, Adun Simunjan Awla Dris enggau Kaban Parlimen Batang Lupar, Datuk Seri Rohani Abdul Karim.