ASAJAYA: Siku lelaki peranak menua tu ditangkap polis laban dipelaba beleman mali ngujungka anak iya beumur 23 taun betubuh bisi.

Ketuai Polis Pelilih Samarahan, DSP Sudirman Kram, madah, lelaki nya ditangkap ba sebuah rumah di Kampung Sadong Jaya, malam tadi.

“Iya ditangkap ngambi mantu pansik bekaul kes diterima piak kami ba Balai Polis Asajaya kena Hari Tiga, urung pukul 6 lemai.

“Saspek beumur 52 taun, ti udah parai bini lalu apai ada tiga anak nyengkaum indu ke betubuh bisi nya,” ku Sudirman.

Sudirman madah, nitihka pansik tumu tetemuka saspek udah dua kali beleman enggau anak iya nya lebuh seduai nyuwa sebuah rumah di Batu Kawa dalam taun 2016.

“Ba penusah keterubah, saspek ngemai anak indu iya beleman lebuh siku nya agi bedandung mansang ke bilik mandi.

“Dua minggu udah nya, seduai sekali agi beleman mali ba rumah ke sama lalu majak ngereja ulah nya,” terang Sudirman ba sebengkah penerang berita kemari.

Ku Sudirman, saspek mega ngaku kala ngereja ulah nya dua kali pengudah badu gawa lalu pindah ngagai Sadong Jaya dalam bulan Februari 2020.