KUCHING: Menteri Penyerakup Bansa, Datuk Halimah Mohamed Sadique muji Unit Pekara Pengarap Bukai (Unifor) ti ditumbuh ba Sarawak.

Ku iya, nya siti komiti ti nyelai enggau ulih ngaul kerejasama, sempekat pemereti ati, bebatak asur, nerima sereta ngembuan basa entara pengarap Islam enggau pengarap bukai ba menua tu.

“Unifor mega siti organisasyen ti engkeman enggau besai reti,” terang Halimah.

Halimah mansutka jaku nya lebuh ngatur pejalai meri basa ngagai Sapit Kepala Menteri Datuk Amar Douglas Uggah ba opis iya, ditu kemari.

Uggah dichiri nyadi Chairman Unifor ke alai unit nya ditumbuh niang ex-Kepala Menteri Tan Sri Adenan Satem ba taun 2016 enggau ditampung Datuk Patinggi Abang Johari Tun Openg.

Terang iya, sida udah belajar enggau deka belajarka mayuh pekara ari Sarawak pasal ngelaku enggau ngenegapka kaul, penyerakup enggau pengelantang entara raban bansa enggau pengarap.

“Unifor tu mega pelasar pemadu engkeman ngambi nyapai mayuh pemujur,” ku iya nyemetak madah.

Ba lansa sama, iya madahka diri udah betemu enggau Yang di-Pertuan Agong apin lama enggau udah madahka iya pasal Unifor nyengkaum tuju enggau pangku pengawa nya.

“Iya deka deka pangku pengawa opis menteri aku dikena mantaika penyerakup enggau pengelantang entara pengarap ba menua tu.

“Aku sekali agi deka betemu enggau Yang di-Pertuan Agong enggau Ketuai Pengarap ba renggat Perintah Besai enggau Nengeri.

“Pia mega, aku mai Datuk Amar (Uggah) ngulu aum nya,” terang Halimah.

Nambahka nya, iya madahka piak opis menteri iya deka bekerejasama enggau Unifor lalu belajar pasal chara mutarka semua penanggul pengarap.

“Kami deka ngena enggau beratika atur Unifor dalam Komiti Penyerakup Raban Bansa kami, ngarapka sida ulih ngembing enggau meri sanding penemu ngagai kami.

Nangkan nya ku Uggah, Unifor udah bejalaika tanggungpengawa ngempit kaul penyerakup entara rayat Sarawak nyengkaum mutarka penanggul enggau nadai bechiping.

“Unifor nya jematan entara Islam enggau raban pengarap bukai ke alai isu ti ulih ngasuh charut deka dikerandau manah enggau diputar ungkup pemaik semua,” ku Uggah nyemetak madah.

Ku iya, pekara tu beguna amat ngagai menua ngambika rayat ulih ngasaika pengelantang enggau penyerakup entara raban bansa enggau pengarap ba Sarawak mengkang dijaga manah.

“Opis Menteri Penyerakup Bansa nya siti opis menteri ke ngembuan besai reti.

“Nya kebuah, Menteri Besai Tan Sri Muhyddin Yassin ngaga pemutus dekaka pekara nya nyadi siti opis menteri kediri,” tandu iya.

Ungkup rikod, Direktor Unifor Richard Lon madah, ari 2.6 juta peranak Sarawak (2013), urung 1.1 juta (42.6 peratus) nya Kristian, 837, 200 (32.2 peratus) nya Islam, 351,000 Buddha (13.5 peratus) enggau 304,000 (11.7 peratus) pengarap bukai lalu urung 2.335 gerija enggau kuil ditumbuh ba menua tu.

Ba pengawa nya, Halimah udah nyuaka chek RM3,625,766 seraya RM3,165,800 disua ngagai Rukun Tetangga Negeri enggau RM459,966 ungkup Opis Pengintu Pengelantang Komuniti ti disua ngagai Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah menerimanya.

Sama datai Menteri Kaunsil Kandang Menua enggau Pengawa Berumah, Datuk Seri Dr Sim Kui Hian enggau Sapit Sekretari Perintah Sarawak, Datuk Ik Pahon.

Halimah mega disempulang Sapit Menteri Penyerakup Bansa Senator Datuk Seri Ti Lian Ker, Ketuai Sekretari (KSU) Opis Menteri Penyerakup Bansa Datuk Wan Suraya Wan Md Radzi enggau ketuai Direktor Opis Menteri Penyerakup Bansa Datuk Hisamuddin Mohd Sujak.