Sebut aja lagu Bajik Tuai jarang peminat lagu Iban enda ngelala siku penanyi ke agi rumpas iya nya Leezuizita anak Ripin tauka lebih dikelala enggau nama Leez Zwita, 28 taun bepun merindang kenyau ari taun 2013.

Ngembuan tikas pelajar Diploma Kejuruteraan Awam ari Politeknik Kuching lalu ngembuan juluk agi deka nampung pelajar ngagai renggat ke lebih tinggi (Degree) nyema bisi awak jemah.

Lebuh dirandau penulis Leez madah diri anak tuai ari dua iku diri menyadi lalu ngentapka pendiau diri ba Kuching.
Leez madahka apai iya, Ripin Paseh bepenatai asal ari Kampung Sebuyau, Ensengei Simunjan lalu indai iya, Floren Dindat asal ari Kampung Tebuan mega ari Simunjan.

Entara lagu Leez ke balat dikerinduka peminat baka Nuan Bujang, Berumah Ba Ati Orang, Pengerindu Amau Dipuchuk Tuga enggau mayuh agi ke bukai.

Serikat rikoding keterubah tesidika pengelandik Leez tu iya nya OCHSP kenyau ari umur iya 20 taun taja apin bisi album maya nya.

DAGANG ONLINE…Leez Zwita mega bisi bejalaika dagang ruti dikumbai The Lee’s Biscuits.

Iya mega suah merindang begulai enggau raban band ba pelilih menua Kuching enggau menua besemak lebuh maya bisi peminta tauka sebarang pengerami baka melah pinang.

Kelimpah belagu, Leez siku orang ke rindu raun neresa menua orang begulai enggau bala bakih enggau diri sebilik.
Ngelansa pasal album baru, iya madah naka tu pengawa ngerikod album baru bisi tejanggal mimit ketegal pengerekai igi penyakit Covid-19.

Pengawa tu deka disambung pengudah Atur Tagang Pejalai Penyuman (PKPP) enggau menua dikenuku liku ari penyakit Covid-19.

Nyerumba kemisi tauka sekumbang ti enda ulih disagi bejalai merindang sekumbang rambau PKP tu tadi, Leez nguna awak lepa bejualka biskut nengah chara online.

“Bejalaika dagang chara online endang sebagi agi inisiatif dikena nambah penatai pemisi. Anang kelalu milih pengawa dikereja asal iya ‘halal’ munyi ku jaku madi kitai bansa Melayu.

LANDIK…Leez maya dikangau merindang ba sebengkah pengerami di Kuching sebedau PKP.

“Pia mega pangka pengelantang, jereki siku-siku mensia endang tetap bisi pasang surut. Nya alai kitai meseti bisi pelin lumur dua nyadika penabat.

“Ambi chunto sekumbang penanggul Covid 19 tu aku nguji ngiga chara bukai iya nya bejual ruti biskut dikumbai The Lee’s Biscuits dikena nambahka penatai belanja laban program merindang dikinsil magang.

“Asil ari dagang online tu, Puji Tuhan bisi dikena napi penanggul. Kelimpah ari belagu aku endang bisi batang pengawa bukai iya nya gawa ba siti serikat pengereja pengawa berumah,” ku iya.

Lebuh ditanya penulis pasal pait manis diasai sekumbang nujah dunya pemerindang, Leez nyaut pekara tetap bisi sereta udah nyadi ‘asam garam’ siku-siku orang ke begelar artis.

“Taja pia pekara nya disimpul enggau jaku pandak dianggap nyadika lalau tauka malin ngajar kitai nyadi lebih tuai runding napi penguji.

BALA BAKIH…Leez begambar kenang enggau bakih lebuh merindang ba sebengkah palan di menua tu.

“Kebendar mayuh penguji udah disepi sekumbang nyadi artis enda ulih tesa enggau leka jaku tang semua nya mujur ditapi berekat ari sampi sereta sukung semua piak enggau diri sebilik.

“Ba aku mega, semua utai ti udah ditapi ngajar kita nyadi lebih berani nyingkang ke mua. Arapka semua pengawa dikereja terus mujur lebih agi ba pengawa ke dikerindu baka merindang tu,”ku iya.

Leez madah diri seruran deka belajar ari orang lama dikena nambahka penemu diri ke seruran diasai semampai bisi pengurang.

“Ukai pengawa muntang dikereja tang anang mega enggai belajar ari orang bukai kelebih agi sida ti udah dulu agi ari kitai,” ku iya.

Berebak lebuh ditanya bekaul enggau mensia mayuh kemaya hari ti rindu agi ninga lagu ba Youtube dibanding enggau meli VCD ku iya madah, nya bepanggai ba pilih diri empu enggau pengelandik ngelakuka lagu tauka VCD diri.

.LEEZ ZWITA

“Mayuh chara kitai ulih nyual VCD kelimpah ari nganjung ke kedai laban diatu kitai ulih bejual nengah online.
“Ditambah ninga lagu ba youtube tetap enda sama diasaika lebuh kitai mending ngena VCD sereta iya mega ulih sereta tan ditaruh nyadika pengingat jemah enggau bisi ngundan kualiti kediri lebih agi ba sukut pemanah audio enggau video.

“Enggau peluang tu, aku meri terima kasih ngagai Ruai, Suara Sarawak laban udah meri peluang ungkup aku bekunsika peneleba diri ba dunya pemerindang.

“Arapka mensia mayuh tauka peminat aku terus besabar nganti penatai album ti deka datai.

“Pia mega anang leju meri sukung ngagai industri muzik kitai Iban, enti ukai kitai sapa agi dikeandal nyukung pengerembai lagu kitai Iban awakka ulih setanding enggau lagu bansa bukai di menua tu,” ku iya.

LEEZ ZWITA