KUCHING: Hotel ICSI Kuching ngemeranka teknologi gadung dikena nyaga rampa menua asal lalu nyadi kelai (ikon) penyungkak ekonomi menua tu.

Menijar Kanan Jualan enggau Pekara Makit iya, Myla Avon David, madah, sida chukup beratka pengawa nyaga pemanah rampa menua ungkup rebak dudi kelimpah nyadi pematak temuai kitu.

Ku Myla, piak pengatur pengawa hotel seruran naka ulih bekenaka kereban ti nadai ngeruga rampa menua baka ngena sistem solar dikena ngulihka bekal kuasa.

“Kami bisi dua sistem solar didiri ba hotel tu empu, siti ba atas dek surau sepiak pegung ba ringkat lima, Rooftop Sky Bar lalu siti agi ba ringkat 13, sama enggau The Sky Lounge,

“Bahagian lobi hotel mega nadai bekenaka kereban penchelap (aircon) tang semina nerima kesuh penyelap ari bilik belajar enggau ke bukai dalam begunan hotel tu,” ku iya nerang.

Myla dirandau Suara Sarawak rambau pejalai raban media nemuai ke hotel sida ba Muara Tebas, Isthmus, Tanjong Seberang Pending, Sejingkat ditu, kena Hari Satu tu tadi.