KUCHING: Siku peranak Kampung Quop Dayak, Padawan berasai lantang laban udah nerima kunchi rumah MySejahtera ke diberi ngagai iya, ditu kemari.

Anang Giranang, 44 taun chukup gaga sereta meri terima kasih ngagai perintah laban udah tu iya deka beridup ba rumah baru ke chukup lantang sereta likun.

Ku Anang, sebedau tu, seduai iya meindai diau ba rumah lama sepiak enggau rumah baru nya sebedau indai iya midang, 10 taun ke udah.

“Ari mit, aku diau kediri enggau indai tang indai udah nadai lalu diatu aku tinggal kediri laban nadai menyadi bukai,” ku sebana Anang.

Lebuh ditanya pasal penatai pemisi iya, Anang madahka jereki diulihka iya semina chukup makai aja.
“Sebedau tu, aku semina kereja bepanggai ngagai gaya hari, enti hari manah nurun gawa.

“Kekadang aku nitihka bala bakih gawa sehari dua kekadang langsung nadai kereja,” ku Anang madaka pengawa diri ke nadai tentu.

Diatu, Anang gawa kediri dikena ngidupka diri laban nadai orang enggau sebilik, taja pia iya bisi nerima bantu bulan ari Opis Pengintu Pengelantang Nengeri Sarawak (JKNS) penyampau RM200 (sebulan).

“Aku deka ransing agi gawa ngiga belanja laban diatu nyamai udah bisi rumah,” ku Anang.

Anang diau ba rumah baru nya kenyau bulan March tu tadi asil projek digaga dibaruh Opis Bomba enggau Penyah Penusah Malaysia (JBPM).

Nambahka nya, rumah nya digaga berengkah ari bulan Disember 2019 ti beungkus RM50,000.

Sebedau tu, Anang semina diau ba langkau bedindingka daun mulung enggau nadai bilik mandi ti menyana.

Rumah ti digaga enggau dua bilik, dua bilik mandi sereta bilik besai deka meri pengelantang ngagai iya.

LANTANG ATI… Anang Giranang