KUCHING: Komiti Penyangga Penusah Ngenyit Nengeri Sarawak (JPBNS) udah ngaga pemutus, semua rayat Sarawak ti pulai ari menua luar enda tau enda dikuarantin pengelama 14 hari ba palan kuarantin ti udah ditetap.

Sapit Kepala Menteri Datuk Amar Douglas Uggah Embas madah, Atur Standard Pengawa (SOP) nya digaga berindik ari 10 kes baru positif Covid-19 dirikodka ba Sarawak, sehari tu.

“Pia mega, sida mega deka beperesa Covid-19 ba hari kedua enggau hari ke-10 ungkup nyidi Covid-19 tu,” ku iya.
Uggah mansutka jaku nya ba aum pemberita Covid-19 ba Begunan Dun Lama, ditu tadi.

Ku Uggah, piak JBPNS mega bisi nyendiaka SOP ba semua sektor enggau aktiviti bukai.

“Entara iya, SOP ungkup piak Dewan Bandaraya Kuching Utara (DBKU) ngaul pengawa muka baru Air Pancut Berirama Waterfront Kuching ti deka dibuka baru sehari tu.

“Opis Menteri Dagang Temuai, Seni enggau Main Asal mega udah netapka SOP ungkup semua pengawa bekaul industri kreatif (multimedia, seni enggau main asal) berengkah tekala nya,” ku iya.

Nambahka nya, Uggah ti mega Chairman JBPNS madahka Opis Menteri Nembiak enggau Lumba udah netapka sektor lumba enggau rekreasyen dibuka bagi renggat ketiga enggau empat ngaul lumba beraban, lumba belaban enggau lumba ngatika diri sereta lumba motor bepun tekala nya.

Naka kemari, bisi 1,856 kedai udah dipatau iya nya palan bebelika barang (352), restoran (382), kilang (16), bank (185), opis perintah (90), pedaja (43) makit (91), rumah sembiang (68), endur belepa (58), taba projek (19) enggau palan bukai (552).