Mensia mayuh terus ditangkan anang sesekali nyadung berita bula bekaul enggau pengerekai penyakit Covid-19.

Sapit Kepala Menteri Datuk Amar Douglas Uggah Embas kena Hari Dua tu tadi bisi ngemansutka tangkan minta penguna media rama badu ngerembaika berita bula laban nya tau ngeruga pengelantang komuniti.

Uggah nyemetak madah, genap berita bula ti dikerembai deka dipansik piak bekuasa awakka pekara nya enda majak nyadi. Pia mega, kena Hari Empat (16 Julai) Ketuai Polis Sarawak Datuk Aidi Ismail pan bisi ngerah pekara ke sebaka sentang penyadung berita bula ti benung digiga polis.

Iya madah kes berita bula chukup berat lalu sereta bisi dikerembai madahka pengerekai penyakit Covid-19 nyadi ba Pasar Stutong. Aidi arapka mensia mayuh meretika pekara tu anang ngasuh orang kelalu irau bekaul enggau Covid-19.

Nyangka sekeda penguna ngumbai pengawa nyadung berita bula tu pekara ke mit, nyadi nya kebendar ilap besai. Enti dituku salah, penguna ti ditemu ngerembaika berita bula ba internet ulih didawa nitihka Kanun Keseksaan dibaruh sekyen 505.

Ukum ba kes tu enti bepelasarka Seksyen 505 (b) Kanun Keseksaan (ngasuh orang takut tauka begau) iya nya tau kena jil manggai dua taun tauka tunggu sereta kededua ukum nya.

Kelimpah ari nya penyadung berita bula mega ulih kena pansik nitihhka Seksyen 233 Akta Komunikasi dan Multimedia 1998 (ngena internet enggau chara salah) tauka tinggang ukum maksimum RM100,000 tauka jil setaun tauka kededua ukum nya nyema dituku salah.

Nya alai, mensia mayuh tauka penguna media rama sekalika ngena telefon pintar tauka komputer mesti bejimat sebedau nyadung sesebengkah berita ke diterima.

Kelimpah ari berita bula pekara ke suah ayan di media rama kemaya hari tu iya nya petenah.

Ungkup penemu orang ti nyadung petenah dalam media rama mega ulih kena ukum kanun Keseksaan dibaruh seksyen 499 nyentuk 502.

Penerang silik sentang petenah bepelasarka seksyen 499 iya nya barang sapa, sekalika enggau jaku ke disebut tauka enggau reti dibacha, signal tauka pekara nyata ngaga tauka mantaika sebarang penyai pasal sesiku orang enggau niat ngerusak tauka bisi kebuah dikena ngelabuh pemanah nama orang nyadi nya terang betenahka orang.

Taja pia, bepelasarka sekyen 499 mega pekara nya ulih dikumbai enda salah enti bisi ngundan 10 iti kebuah ke patut iya dibantai ngagai orang bukai.

Ambika chunto kesatu, iya tau dikumbai ukai petenah nyema utai nya amat nyadi ba sesiku orang lalu iya patut dibantai ke pemaik orang mayuh.

Udah nya kedua iya ukai petenah enti nyebut enggau lurus pasal ulah pendiau orang ke gawa perintah sentang pengawa manah ke digaga iya. Ke bukai iya ukai petenah enti pekara nya udah diputuska ba kort.

Orang ke didawa salah ngaga petenah enti udah dituku salah bepelasarka Sekyen 500 Kanun Keseksaan iya nya ulih dijil manggai dua taun tauka tunggu sereta kededua ukum nya.

Lansa undang-undang nya diambi penulis ari bup ‘Jenayah Berkaitan Komputer ditulis Anita Abdul Rahim enggau Nazura Abdul Manap dichelak Dewan Bahasa dan Pustaka Kuala Lumpur 2016.

Nya alai, anang enda berunding panjai sereta berati manah sebedau nampung tauka mansutka sebarang penemu lebih agi ba media rama awakka pekara nya enda pulaika pemedis ngagai diri empu.

PENGHULU RUAI
ALVESTER BIGOL