MARUDI: Menteri Muda Kaunsil Kandang Menua enggau Pengawa Berumah, Datuk Penguang Manggil keran mutarka penanggul bekal kuasa karan enggau ai ba kandang menua tu.

Kemari, Penguang udah ngatur randau ba Dewan Suarah Marudi entara piak Sarawak Energy Berhad (SEB) enggau Opis Bekal Ai Menua Pesisir (JBALB) begulai enggau tuai komuniti, tuai raban bansa enggau gerempung ukai dikuasa perintah (NGO).

Batang tuju randau nya laban deka mendingka piak ejensi nerang pasal penanggul kuasa karan enggau bekal ai ba Marudi nyengkaum Beluru.

Ku Penguang, iya mega meri peluang ngagai piak JBALB enggau SEB mantaika chara mutarka penanggul tu.

Pia mega, bala penyereta ulih betanyaka mayuh bengkah pekara ngagai sida empu pasal penanggul tu.

“Bekaul penanggul bekal kuasa karan kena 2 ngagai 4 enggau 16 Julai tu tadi, piak SEB madah penanggul tu bepun ari tiang api dalam kampung kena pangka kilat.

“Pia mega, SEB madah pengawa ngemanah stesyen mit ba Marudi enggau Bunut deka mutarka penanggul bekal kuasa karan tejanggal ba Marudi,” ku iya.

Nambahka nya ku uya, piak SEB mega naka ulih nyendiaka sebuah injin api ba Marudi kelebih agi dikena ba sepital enti bekal kuasa karan tejanggal.