KUCHING: Cuepacs Nengeri Sarawak (CNS) nyukung perambu atur mesti ngena sengkabung mua ba palan mensia mayuh.

Presiden CNS Ahmad Malie madah, perambu nya patut disukung berindik ari kes positif baru Covid-19 majak nambah beberapa hari ke udah.

Ku iya, rikod kluster baru ti ditemu nyadi mega balat ngirauka ati semua piak.

“CNS ngasaika penyampau kes baru positif enggau kluster baru ngasuh kitai irau ati.

“Ari kes dirikod nya mega ngayanka gelumbang kedua Covid-19 diatu mangka menua kitai.

“Nya alai, atur mesti ngena sengkabung mua ba palan mensia mayuh endang patut laban perang kitai enggau Covid-19 bedau abis,” ku iya ba siti penerang media kemari.

Kelimpah ari nya, CNS mega irau meda mensia mayuh ti mantaika gambar nadai ngena sengkabung mua kelimpah enda nitih Atur Standard Pengawa (SOP) udah ditetap.