SIBU: Bangkai pengereja kapal peranak India ti diripot labuh ke Batang Rajang kena lemai Hari Satu nyin tadi udah ditemu pagi Hari Tiga.

Niang benama Pandey Saurev beumur 21 taun ditemu mensia mayuh melepung semak jelatung Kampung Serban Batang Lassa, Daro.

Tu ngujungka operasyen ngiga enggau nyelamat (SAR) diketu pengudah dipejalai kenyau ari Hari Satu nyin tadi.

Sapit Ketuai Polis Pelilih Sibu, Supt Collin Babat, ba sebengkah penerang kemari madah, bangkai niang ditemu peranak dia urung pukul 11 pagi.

Ku iya, Sigat Agok, 57 taun, ke benung berandau enggau bakih iya ba jelatung Kampung Serban, Batang Lassa tekenyit meda utai melepung baka bangkai mensia ti anyut ari ulu.

“Sigat udah nya nanchang kaki kiba niang ngena tali ke bisi ba jelatung laban irauka iya majak rarat jauh agi,” ku Collin.