SRI AMAN: Siku lelaki ditukuka lenyau pengudah ditagup jagu ba Sungai Seduku Ili Lingga, pagi tadi.

Lelaki ti benama Kong Gindi, 47 taun nya benung nimba perau begulai enggau bakih iya ti ngemata penusah tu.

Nitihka ripot ari piak Raban Penyaga Orang Periman (APM) Pelilih Sri Aman, bakih Gindi madahka iya bisi meda Gindi ditagup jagu ba bau sepiak kiba lebuh Gindi benung meresa enggau nimba perau,” ku penerang nya.

Naka tu, APM madahka sida benung ngiga tudah Gindi tu penyauh tiga kilometer ari jelatung endur iya ditagup jagu.

Nambahka nya, peranak rumah panjai enggau piak Bomba enggau Penyah Penusah Sri Aman mega sama nyereta Operasyen Nyidi enggau Nyelamat (SAR) tu.

Ku peranak ba genturung pendiau nya, lebuh nyidi tudah Gindi, sida bisi tepedaka iya ba tebing sungai enggau jagu nya tang jagu nya udah narit tubuh iya ke dalam sungai baru pengudah sida semak nya.

Naka berita tu ditulis, operasyen SAR mengkang dipejalai ba sungai nya.