Kenyau ari munya bansa Dayak Iban endang kaya enggau leka main lalu sebagi ari leka main nya ngembaun bemacham tuju kelimpah ngagai pemerindang dikena nusui tauka ngerintaika sekeda pekara ke udah, benung enggau deka nyadi.

Kelia lebuh aki ini kitai empai nemu nyurat dia sida nguna bemacham chara nyerita, ngading pekara ke nyadi awakka tau ditampung enggau enda lela diserunyut jeman sereta ngandalka nya tau ditampung sida ke rebak nya.

Entara leka main ke patut ditemu sereta dipelajarka kitai rebak baru iya nya Ganu, Jawang, Pelandai, Sugi, Ramban, Dungai, Pantun, Denjang, Renung, Sanggai, Pengap enggau mayuh agi ke bukai.

Taja pia, genap main asal tu disada nitihka tuju enggau pengelandik siku-siku orang ti nyada lalu disada rumpas nadai disempulang enggau sebarang kereban muzik baka lagu.

Siti ari leka main ke deka dilansa penulis serak tu iya nya Ganu. Leka main tu kenu ku siku lemambang ke landik ngarang pelandai belangkung karung, Ensalih Achop Entu, 61 ari Engkilili madahka Ganu tu asal ari menua Tatau, Bintulu.

Tandu iya, Ganu mega sebengkah ari main asal ke tau dikumbai baru enti dibanding enggau Jawang tauka Dungai.

Leka Ganu ngundan sebana penusah (minta sukung tauka tulung) kelimpah ari jaku puji dikena bebuti. Nya alai, iya chukup manah dibantai nyerumba penatai bala pemesai ti bisi niki rumah panjai tauka bejadi sesebengkah pengerami.

Nangkan nya ba penemu Ketuai Asadia, Mabong Unggang madahka Ganu tu nadai ngundan jaku nyembah ari sukut pengarap.

“Ganu penuh enggau leka jaku manah, ditusun, dirintai berurun enggau munyi ti setimbal tau ngasuh nyinuk, ngerindang ati orang ti ninga sereta bisi meri ajar tauka langgur penemu ke manah.

“Pia mega Ganu ngundan jaku ti lembut, ngundan peminta enggau chara ke liut sereta beradat,” ku iya seraya madah leka main Ganu kala dibantai di Batang Ai Lubok Antu, Tinjar enggau Teru di Baram.

Pengawa Beganu tu ulih disadaka sebarang orang sekalika indu tauka lelaki lalu nadai ngira renggat umur. Pemanjai timpuh Ganu bepelasarka sekeda sada nyawa sida Beganu ke bisi dirakam iya nya urung lima minit.

Sebedau tu surat kabar Suara Sarawak bisi mantaika gerah pasal Pekit Beganu Online ti deka diatur Akademi Serakup Dayak Iban Sarawak (Asadia).

Dalam penerang nya, madahka pekit tu berengkah 1 nyentuk 16 Ogos 2020 lalu bala mensia mayuh ti deka ngujika pengelandik Beganu anang ngelepaska peluang tu.

Chara nyereta pekit tu chukup muntang iya nya semina nganjung video diri ke udah Beganu nuju email asadiabt7@gmail.com.

Penerang silik pasal pekit tu tau betelefon terus nuju Mabong ba lumur 012-6925562 enggau Sekretari pekit Victoria Jimmy (012-2161485).

Tuju pekit tu diatur dikena ngading orang, meri peransang, mantaika sebana sereta dikena ngetan sereta ngerembaika jaku Iban.

Nya alai, arapka pekit tu nerima sambut ke manah ari raban bansa Dayak Iban di selampur menua tu nadai ngira biak enggau tuai awakka jaku kitai Iban terus entuchung baka bukit, engkebung baka langit, tampak baka pulau, rawak baka danau.