LINGGA: Projek pemansang tebing pasar Lingga ke benung digaga deka ngubah landskap pasar Lingga sereta nambahka pemanah iya ke betunga enggau ai Batang Lupar.

Ke ku Sapit Kepala Menteri Datuk Amar Awang Tengah Ali Hasan, Lingga nadai agi nyadi pasar ke enda dipeda pengudah perintah setuju besambungka iya enggau sitak luar nengah sekeda projek jalai ke deka digaga.

“Lebih agi pengawa ngaga Jalai Sebuyau-Lingga diatu ba renggat diserah ngagai kunteriktor awakka dipejalai enda lama agi.

“Semua projek tu deka ngubah lanskap pemansang di Lingga ti ngembuan pendiau kediri, iya nya betunga enggau Batang Lupar,” ku iya.

Iya ke mega Menteri Pemansang Mengeri enggau Pengeraja Asal Kedua enggau mega Menteri Dagang Entarabansa enggau Industri, Terminal Industri enggau Pemansang Dagang madah munyi nya maya dirandau pemberita pengudah bejalaika pengawa matau ngagai taba projek pemansang tebing Lingga ditu, kemari.

ARAP MUJUR… Awang Tengah disempulang Simoi rambau ngabas taba projek pemansang tebing pasar Lingga ditu kemari.

Ku iya, ukai semina meri perengkaguna rekreasyen tang mega nyendiaka premis endur rayat mayuh bedagang tauka bedaja.

“Lingga udah tu deka besambung enggau Sebuyau.. Insya-Allah enti udah dikemujur Jalai Besai Kedua, Jalai Pesisir, Lingga tu deka dibuka.

“Pia mega diatu udah besambung enggau Sri Aman nengah jalai ke majak manah…enda baka suba, perengkaguna pemun pan udah bisi…tu deka nyadi palan sangkai.

“Aku andal tu peluang Lingga angkat mansang sereta peluang ngagai ngagai mensia mayuh besemak ngaul diri ba pengawa dagang,” ku iya.

Taja pia, ku iya Perintah Sarawak deka bejalaika projek tu berenggat lalu iya seruran nambahka perengkaguna bukai baka Palan Servis Lingga ungkup pengelantang rayat.

Awang Tengah madah, projek pemansang tebing Lingga deka nengah tiga renggat.

“Fasa keterubah udah bejalai enggau ungkus RM3.9 juta dipelaba tembu 6 Mei 2021. Status diatu tembu 22 peratus lalu benung disambung ungkup renggat ke nangkan tu.

“Aku ngarap tu ulih nyadi pemungkal pemansang ke lebih besai. Beri tabi puji Adun Lingga Simoi Peri,” ku iya.

Sama datai Menteri Muda Pengelantang Komuniti Datuk Francis Harden Hollis enggau Residen Bagi Menua Sri Aman Indit Bangai.

Ungkup penemu sekeda pengelebih menua Lingga ke ulih matak penatai temuai kitu iya nya ngembuan Palan Pansik Ikan Terubok, ditemu baya ai masin ke bebesai, bisi Gunung Lesung, Ai Wong Balau, gerija pemadu tuai tauka keterubah di Sarawak iya nya St Paul di Banting, Pasar Kuboi, becha ngena motosikal, Seduku Agropolitan, tebing pasir ti panjai enggau peranak menua tu ke chukup kemerah.