MUKAH: Pengelebih pasar lama ba tebing Batang Mukah, mengkang nyadi palan dikerindu mensia mayuh besemak nyengkaum temuai ari luar beduduk ari pemanah rampa kandang endur tu ditu.

Pasar ti berimbai enggau nanga sungai Mukah rembus ke Tasik China Selatan nya bisi nyendiaka mayuh bansa barang guna ninting hari.

Tu mih pasar besai ditu ti ngundan tiga makit besai iya nya tamu basah enggau rangkai enggau makit sayur.

Takah tiga makit tu enggau pangan diri semina beberapa meter aja lalu nya ngemuntang mensia mayuh milih barang dikedeka diri.

Kebendar, pasar lama tu lebih mayuh temuai datai dibanding enggau pasar baru lebih agi maya pukul 8 pagi nyentuk tengahari.

AGI LAKU…Pasar Lama Mukah ke seruran rami ditapatka mensia mayuh

Ba makit basah, pedaja ukai semina bisi nyual lauk babas tang mega nyendiaka pemakai tasik ke agi baru baka umai.

Udah nya, makit rangkai enggau tamu bisi nyual bemacham barang enggau pemakai tasik ke udah rangkai dijembi nyengkum asil kampung.

Kelimpah nyual pemakai eksotik baka tindu pasar lama tu mega bisi kedai kopi ke chukup nyamai diirup dipenggi Kaunsil Pelilih Dalat enggau Mukah (MDDM), berumbai enggai makit basah.

Temuai ulih ngelawa kedai tu urung pukul 6 pagi lalu tutup tengahari. Nitih penerang temuai ke suah kia, pasar lama ukai semina bisi kopi ke nyamai tang mega bisi nyendiaka pemakai ungkup raban muslim (halal) enggau ukai muslim ke saum perabung.

Tebal agi produk halal dijual kediri ba sepiak kanan, udah nya pemakai ke enda halal dijual ba sepika kiba kedai.

SEMAK SUNGAI…Pasar Lama Mukah tu berimbai enggau nanga sungai ti rembus ngagai Tasik China Selatan.

Tauke kedai bela ngembuan kaul ke manah enggau pangan diri. Tu mih kelai penyerakup ke dipandang pedagang ba pasar lama tu.

Ba pasar lama tu mega bisi dua iti bantu ungkup pengelantang mensia mayuh. Kelimpah nya, temuai ke datai kitu muntang bemalam laban bisi empat buah hotel murah besemak enggau pasar lama tu.

Udah nya, ba pasar lama tu bisi klinik komuniti Mukah nyengkaum sebuah sebuah farmasi swasta ke dibuka kenyau tiga taun ke udah.

Bisi siti tugu sejarah ditu iya nya churung kilang mulung ke digaga ari bata. Tugu tu digaga 20 meter peninggi bepalan ba sepiak tepikong semak sungai.

Nitih cherita, churung tu kebendar kilang mulung Mukah kelia ti ditutup urung pun kurun ke-19 berindik ari industri mulung kusut. Tu nyadi pematak penatai temuai kitu.

Pasar lama seruran rami ditapatka mensia mayuh.

PRODUK MULUNG…Bemacham produk ari mulung ke bisi dijual ba makit Pasar Lama Mukah.