BINTULU: Adat nasih tanah udah mujur dipejalaika peranak rumah panjai Rh Seliong enggau Rh Bangau, Batu 35, Jalan Bintulu-Miri dikena minta merekat ngambi ke tanah belemak lalu ngasuh utai tanam sida tumbuh galak.

Tuai Rumah (Tr) Seliong madah, nasih tanah sigi pengawa asal bansa Iban lebuh sida meda utai tanam enda tentu nyadi ditambah ke tanah majak kusi.

“Nasih tanah tu dipenyadi enggau piring ading dikena minta berekat ngagai Petara ngambika utai tanam tumbuh galak lalu ulih mansut asil ti mayuh,” ku iya.

Tr. Seliong mansut ke jaku nya ba pengawa nasih tanah di kebun peranak dua buah rumah panjai nya pagi tadi.

Ku Seliong, lebuh ke ngintu pengawa nasih tanah nya, pua kumbu digantung dinyadika tambai.

MIRING… Majang enggau Pengulu Man ngaduka piring dikena nasih tanah.

“Keterubah tambai pua kumbu digantung udah nya lalu berengkah miring sebedau piring nya dibiau ngena manuk,” ku iya.

Nambah ke nya ia madah, pengawa nasih mesti dikereja ba tanah.

“Udah miring tembu dia jani siku deka digayang nyadika genselan lalu darah jani dikena nyimbah tanah ti deka endur numbuh utai,” ku iya.

Sama bisi datai ngagai pengawa nasih tanah iya nya Kaban Kunsil Negeri (Adun) Samalaju Majang Renggi enggau Pengulu Man Imbak.

Ba randau ngelansa, Majang bisi bendar pengarap ati pengawa nasih tanah ulih dikereja lalu ditanka enggaika lenyau disegang arus pemansang.

Ku iya, adat nasih tanah ukai semina dikena minta berekat tang ulih ngerapat ke kaul enggau diri serumah.

ADAT… Majang ngemataka pengawa manchak jani nyadika genselan ngemujurka pengawa nya.