SARATOK: Rayat Rumah Bama di Nanga Rissau ditu berasai lantang pengudah peminta sida ditangkup.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju madah, iya naka ulih nangkup peminta rayat ngena chara berenggat.

Ku Ali, rayat bisi hak minta lalu pengari rayat patut semampai mendingka peminta nembiak redak iya ungkup pemansang enggau pengelantang semua.

“Sehari tu, penatai kami sebuat mai berita manah ngagai kita serumah baka udah disemaya sebedau tu.

“Penatai kami mega ukai mai jari puang tang bisi buah pengingat ti tau dikenang dataika anak uchu kitai jemah, bisi ke tanda kitai ampit buah pemansang.

“Ngambika enda nyadi lalai entelah ngagai semua kitai bisi gempuru ditu, agih belanja sepenyampau RM25,000 udah dikemendar enggau disua ngagai kita sehari tu,” ku iya.

Jaku Ali nya dikenataika pengari iya, Baraw Umak, ba pengawa nyuaka chek Projek Mit Pemansang Menua Pesisir (MRP) ngagai Rumah Bama, Nanga Rissau ditu, ensanus.

Ungkup penerang, Komiti Pemansang enggau Pengelikun Genturung Pendiau (JKKK) Rumah Bama nerima RM20,000 seraya Biro Indu ampit RM5,000 baka dipinta sebedau tu.