KUCHING: Pejalai semua serikat penerebai bilun ari enggau ke Sarawak deka dikurang berengkah 1 Ogos tu seriris enggau pemutus ke digaga Komiti Penyangga Penusah Ngenyit Nengeri (JPBN), 27 Julai tu tadi.

Menteri Perengka Pengangkut Datuk Lee Kim Shin madah, pemutus nya digaga berindik ari kes pandemik Covid-19 majak niki di Sarawak lebih agi ba Kuching, Samarahan dan Serian.

“Tu beguna amat endur bala penumpang enggau staf bilun nitihka Atur Pengawa Standard (SOP) ke udah diletak Kaunsil Pengelikun Menua (MKN) enggau JPBN maya ba dalam bilun.

“Nya alai, penerebai serikat MAS ari tauka nuju Sibu ngagai tauka ari Kuala Lumpur ditatak sekali seminggu udah nya nuju enggau ari Bintulu enggau Miri ari tauka ngagai Kuala Lumpur dua kali seminggu,” ku iya nengah sebengkah penerang kemari.