RABAN Indu jeman diatu mesti berani ngemajuka diri bekenaka pengelandik dikemisi, pia ku Cecelia Lagak, Pemungkal CC Beauty lebuh ngatur program begulai enggau bala indu di Kemena.

Ku Cecelia, raban indu mega patut pintar runding belajarka macham pengawa bepelasarka pengelandik jari nyadika dagang dikena nambahka penatai pemisi sida.

Cecelia mega madah, dagang tu sebagi ari chara raban indu ngubah pengidup diri kelimpah nyungkak pemansang ekonomi menua.

Bala indu mega mesti berani ngaul diri ba mayuh program diatur pedagang indu menua tu ti udah mujur ngangkatka diri ba dagang ngambika sida sama maju nitihka singkang orang bukai.

BISI INISIATIF KEDIRI

TANDA TERIMA KASIH… Cecelia nerima setipikit ari piak SIDS laban udah bekunsika penemu pasal chara ngaga sabun kediri.

Berindik ari nya, Cecelia ngena peluang ke bisi ngajar bala indu senentang chara ngaga sabun kediri ari minyak makai ke udah dikena enggau digulai utai bukai.

“Ari minyak makai ke udah dikena nya dibuai pia aja, manah agi kitai ngena baru ungkup guna bukai baka nyadi penuchi pinggan,” terang iya.

Iya mega bisi ngajar bala indu baka ni chara ngaga sabun ari daun serai ngambika bau rengut sereta manahka pengerai kulit enggau nyaga bau tubuh.

Pengawa ngaga sabun nya sekeda ari isi Program Berambeh begulai enggau SIDS Pampang Kemena ba Rumah Nelson Sandom, Sigu, Pandan ditu, ujung minggu nyin tadi.

BAKA TU… Cecelia ngajar bala penyereta chara ngaga sabun ari serai enggau minyak makai ke udah dikena.

Ku Cecelia, iya nerima manah tuju pengawa diatur Serakup Indu Dayak Sarawak (SIDS) ti keran ngenegapka orang indu ngena pengelandik ke tau diangkat nyadi dagang.

Aktiviti bukai bisi diatur sehari nya baka ngait selampai enggau ke bukai dikena ngempitka agi kaul entara sida.

“Batang tuju program tu laban dekaka bala indu sama belajar ngaga sabun ari utai ke deka dikena baka minyak makai.

“Dagang tu ulih dijual enggau nambahka penatai pemisi ruang bilik sida.

ENDA RANGKA PENEMU

GAGA MANAH… Cecelia benung nuang sabun ke udah digaga ngagai kuntina nitihka chuan dikedeka sida.

Nangkan nya ku Cecelia, program baka tu sebagi ari chara pedagang indu mantu bala bukai ngambi ulih sama ngemansangka diri sereta nyaup diri sebilik.

“Nadai salah bekunsika penemu ngambi bansa kitai bela nemu bedagang enda ngira dagang mit tauka besai.

”Ari dagang nya, kitai ulih ngangkatka diri sebaka enggau orang bukai nitihka asil pengelandik kitai,” tandu iya.

Berebak enggau nya ku iya, pengawa ngena baru utai ke udah dikena tauka ngelama tu semina dibuai pia aja sebagi ari chara kitai nyaga rampa menua ngambi enda ngasilka mayuh uras.

Kitai deka mai bala enti beratika pemesai guna utai ke bisi ngelingi sida, ulih dikena baru lalu ulih mega mansutka asil bukai enti diubah nyadi produk baru.

Cecelia madah, penemu baka tu ke patut dikunsi ngambika ulih ngerembai enggau mansang sempama baka buah ubi enti laun dikali buruk di pun, buah empasa laun diempa lunggar taun.

“Nya alai, kitai sigi patut bekunsika buah penemu ti manah enggau pangan diri, baka ke beduaka lampang rusa, bebagika lampang babi, ngenjuk lampang pelanduk, betetakka lampang bayak.

“Ngambika utai ti berat tau nyadi lempung, utai simpi tau segala, utai bingkuk tau lurus.

“Bekunsi kitai pengidup ti manah enggau pangan diri ngambi ke bansa kitai tau pegari ditemu dunya, bediri sama tinggi, duduk sama pemaruh enggau bansa bukai,” ku iya madah nyemetak.

PRODUK BARU… Sabun ari minyak makai ke udah dikena tu entara inovasyen ti diajar Cecelia ngagai bala penyereta.

NYAGA RAMPA MENUA

Ku iya, mayuh inovasyen diatu endang nengah chara ngena baru sereta nyaga rampa menua.

Ambika banding, straw ari berau enggau utai bukai ke tau diempa tauka ulih luluh kediri.

“Kitai mesti besaup nyaga rampa menua kelimpah ulih ngemansangka dagang diri ba menua tu.

“Ba aku empu, genap pengawa dikereja kitai mesti bisi tuju enggau kebuah laban dua pekara tu deka nentuka pemujur pengawa kitai nya dudi hari.

“Ambika chunto, pengawa ngaga sabun ari minyak makai ke udah dikena tu endang tuju nyaga rampa menua ari kamah ketegal laluh minyak ke dibuai.

“Ari nya, ukai semina rampa menua aja ulih dijaga, tang kitai ngena pengelandik nempa utai ke baru ari laluh minyak makai nya tadi.

“Kitai beratika pengawa tu nipak enggau nangkup peminta raban ti siruka rampa menua asal,” tandu Cecelia.

INDU MANSANG

Ba lansa sama, mayuh raban indu ba Kemena udah nyereta program tu baka ari Biro Indu Sigu, raban indu SIDS Kemena enggau ke bukai.

Aktiviti ti bisi diatur lebuh nya baka licha bekaul Pangku Pengawa Biro Indu dalam Komiti Pemansang enggau Pengelikun Genturung Pendiau (JKKK) Rumah Panjai ti dikenatai Jerida Andin, Pemesai Pengereja Pengawa Unit Komunikasyen Perintah Sarawak (Ukas) Bagi Menua Bintulu.

Ba lansa bukai, program bukai ti bisi diatur sehari nya baka randau enggau serakup indu sereta randau enggau Nilawati ti mega siku pemungkal jamu ke udah mujur ba Bintulu.

Chairperson SIDS Kemena, Jenny Bangga nyemetak madah, SIDS tu nyadi tiang sukung raban indu ari sukut pekara pelajar, ngiri penemu, ekonomi enggau ke bukai ngambi ngerembaika tanggungpengawa indu Dayak.

Nya kebuah, iya dekaka mayuh agi indu Dayak ngaul diri ba pemansang menua.

“Raban indu ukai semina diau diri aja tang sama ngemansangka menua,” ku iya madah nyemetak.