KUCHING: Rayat di nengeri dilalalu ngambika terus bejejaga laban bisi 10 kluster ke agi ngerekai ba nengeri tu.
Sehari tu diripotka kes positif di Sarawak mengkang 677 kes berindik ari nadai penambah kes baru, ku Sapit Kepala Menteri Datuk Amar Douglas Uggah Embas.

Nangkan nya, iya madahka, enam kes baru suman sereta dikemendarka pansut ari Sepital Besai Sarawak (SGH), sehari tu.

“Empat ari sida nya ari pelilih Kuching lalu dua ari pelilih Samarahan.

“Tu ngujungka penyampau kes positif Covid-19 ke udah suman sereta dikemendarka pansut naka sehari tu bisi 571 iku tauka 84.34 peratus,” ku iya lebuh bejaku ba aum pemberita di Begunan Dun Lama sehari tu.

Nangkan nya, iya madahka Opis Pengerai Nengeri Sarawak (JKNS) udah bebendar ngaga pengawa nyidi kaul semak ngagai kes positif ba nengeri tu.

“Sida ukai semina nyidi kes positif tang matau sektor bekaul baka taba projek, ladang enggau ke bukai,” ku iya ti mega nyadi Chairman Komiti Penyangga Penusah Ngenyit Nengeri (JPBN).

Ungkup rikod, 10 kluster ke agi aktif ba nengeri tu nyengkaum Kluster Kompeni Injinir (mengkang lapan kes), Kluster Mambong (mengkang tujuh kes), Kluster Palan Perubat (mengkang tiga kes), Kluster Jupiter (mengkang tiga kes), Kluster Pasar Stutong (mengkang tujuh kes), Kluster Jeti Kuching (mengkang dua kes), Kluster Sentosa (mengkang 31 kes), Kluster PUI Melbourne (mengkang tiga kes), Kluster Syarikat Pembinaan Kuching (mengkang dua kes) dan Kluster Pasar Satok (mengkang empat kes).